KazTAG хабарлайды: Халықаралық валюта қоры (ХВҚ) 2026 жылы Қазақстандағы инфляция деңгейі 11% болады деп болжап отыр. Бұл туралы Қазақстан бойынша ХВҚ миссиясының жетекшісі Әли әл-Эйд Астанада өткен баспасөз мәслихатында мәлімдеді. «Біз инфляция жыл соңына қарай шамамен 13% деңгейінде сақталады, ал 2026 жылдың соңына қарай сәл төмендеп, 11% шамасында болады деп болжаймыз», — деді ол сәрсенбі күні өткен жиында. ХВҚ бақылауына сәйкес, инфляциялық қысым бірқатар факторлармен байланысты: ішкі сұраныстың жоғары болуы, импорттық тауарлардың қымбаттауы, коммуналдық қызмет тарифтерінің өсуі секілді уақытша әсерлер, сондай-ақ 2026 жылға жоспарланған салықтық реформалар.
Евразия24 пікірі:
Премьер-Министр орынбасары – Ұлттық экономика министрі Серік Жұманғарин де 22 қазанда Мәжіліс отырысында сөйлеген сөзінде 2026 жылға болжанатын инфляцияны 9–11% деңгейінде болады деп атаған еді. Алайда, тәуелсіз сарапшылар қауымдастығы бұған әлдеқайда күмәнмен қарайды. Мәселен, экономист Арман Бейсембаев Forbes.kz басылымына берген пікірінде 2026 жылы инфляцияны бұл межеде ұстап қалуға негіз болатын нақты сценарий көріп тұрмағанын айтты. «Біздің үкімет жыл сайын шынайы көрініске қарағанда әлдеқайда оптимистік болжамдар жасайды. Бұл – бюджеттік шығындар мен экономиканың даму перспективаларына, сондай-ақ инфляцияға да қатысты. Мәселен, биылғы жылы Ұлттық банк те, Үкімет те, бірқатар сарапшылар да инфляцияны 8–10% деңгейінде болады деп күткен. Ал шын мәнінде не болып жатыр? Қыркүйек қорытындысы бойынша – 12,9%. Қазан айының деректері қарашада жарияланғанда, бұл көрсеткіш 13%-ға жетуі мүмкін. Желтоқсанға қарай – 14%, ал жыл соңын 14,5%-бен аяқтасақ та жақсы болар еді. Демек, болжам жасау – әрқашан тәуекелді іс. Үкіметтің 9–11% деген аралықты көрсетуі – шынайы жағдайдан гөрі жұмсартып, көркемделген бағалау», – дейді сарапшы. Бұл жолы қалай боларын уақыт көрсетеді.
