Астана. 3 наурыз. ИНТЕРФАКС-ҚАЗАҚСТАН – 2025 жылдың қорытындысы бойынша Қазақстанның теңіз порттары арқылы жүк ауыстырып тиеу көлемі 8 млн тоннаға жетті. Бұл туралы Премьер-Министр Олжас Бектенов «Казахстанская правда» газетінде жарияланған мақаласында мәлімдеді.
«2025 жылдың қорытындысы бойынша порттар арқылы жүк өткізу көлемі 8 млн тоннаға дейін өсті. Контейнерлік тасымалдар 90 мың бірліктен асты. Салыстыру үшін айтсақ, 2024 жылы бұл көрсеткіш шамамен 60 мың контейнер болған», – деп жазды Үкімет басшысы.
Оның айтуынша, теңіз порттарының жиынтық өткізу қабілеті қазір 22 млн тоннаны құрайды. Оның ішінде Ақтау порты арқылы шамамен 15 млн тонна, ал Құрық порты арқылы 7 млн тонна жүк өткізу мүмкіндігі бар.
Бұған дейін 2024 жылдың 10 айында Қазақстанның теңіз порттары арқылы 6,2 млн тонна жүк тасымалданғаны хабарланған еді.
Ақтау теңіз порты Каспий теңізінің шығыс жағалауында орналасқан және түрлі құрғақ жүктерді, шикі мұнай мен мұнай өнімдерін халықаралық бағытта тасымалдауға арналған.
Құрық порты Транскаспий халықаралық көлік бағыты (ТХКБ) бойында, Ақтау қаласынан 90 шақырым жерде орналасқан. Порт құрамында теміржол және автокөлік айлақтары бар паром кешені жұмыс істейді. Ол астық, мұнай өнімдері, тыңайтқыштар, химиялық өнімдер және өзге де жүктерді ауыстырып тиеуге бейімделген.
