Астана. 3 наурыз. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев сейсенбі күні Ішкі істер министрі Ержан Сәденовтің елдегі криминогендік ахуал және қоғамдық қауіпсіздік пен құқықтық тәртіпті қамтамасыз ету жөніндегі есебін тыңдады. Бұл туралы Президенттің баспасөз қызметі хабарлады.
Таратылған ақпаратқа сәйкес, Ержан Сәденовтің мәлімдеуінше, 2026 жылдың алғашқы екі айының қорытындысы бойынша Қазақстанда қылмыс деңгейі 8%-ға төмендеген. Бұл өткен жылдың осы кезеңімен салыстырғанда 1,3 мың қылмысқа аз. Негізгі құқық бұзушылық санаттары бойынша төмендеу байқалып, қылмыстардың ашылу деңгейі артқан.
ІІМ басшысы профилактикалық шаралар мен шетелдік құқық қорғау органдарымен өзара іс-қимылдың нәтижесінде киберқылмыстар саны 4%-ға қысқарғанын атап өтті.
«Ұйымдасқан қылмысқа қарсы іс-қимыл аясында 71 ұйымдасқан қылмыстық топ мүшесі қылмыстық жауапкершілікке тартылды, 11 топтың қызметі тоқтатылды», – делінген хабарламада.
Сонымен қатар есірткі қылмысына қарсы күрес белсенді жүргізілуде: бес есірткі зертханасы жойылды. Заңсыз айналымға 881,5 кг түрлі есірткі заттарының, оның ішінде 104 кг-нан астам синтетикалық заттардың түсуіне жол берілмеді.
Президентке көшелердегі құқықтық тәртіп пен жол қауіпсіздігін қамтамасыз ету үшін цифрлық шешімдерді енгізу ауқымын кеңейту, көші-қон бақылауын күшейту және жазаның бұлтартпастығын қамтамасыз ету жөніндегі шаралар туралы да баяндалды.
Кездесу қорытындысы бойынша Мемлекет басшысы елдегі қоғамдық қауіпсіздік пен құқықтық тәртіпті одан әрі нығайтуға бағытталған бірқатар тапсырма берді.
