Астана. 27 тамыз. ИНТЕРФАКС-ҚАЗАҚСТАН – Құрылтай сайлауында жеңіске жеткен «Әділет» партиясы депутаттық мандаттарды бөлді, деп хабарлады партияның баспасөз қызметі.
«Айбек Дәдебайдың төрағалығымен партия Саяси кеңесі бюросының отырысы өтті. Отырыста елдің бір палаталы парламентіндегі депутаттық мандатқа ие болған 110 кандидаттың тізімі бекітілді. Тиісті шешім мен партиялық тізім бірінші шақырылымдағы Құрылтай депутаттарын ресми тіркеу үшін Орталық сайлау комиссиясына жолданды», – делінген партия сайтында жарияланған хабарламада.
Жарияланған тізімге партия төрағасы, Президент Әкімшілігінің бұрынғы басшысы Айбек Дәдебай, Бала құқықтары жөніндегі уәкіл Динара Зәкиева, Жоғары аудиторлық палатаның бұрынғы төрағасы Наталья Годунова, кәсіпкер Дана Медеуова, Мәжілістің бұрынғы 20 депутаты, Сенаттың бұрынғы төрт депутаты және басқа да азаматтар енген.
Қазақстандық бірқатар БАҚ-тың мәліметінше, Дана Медеуова – Мемлекет басшысы Қасым-Жомарт Тоқаевтың жиені.
Партия фракциясындағы 110 депутаттың 37-сі – әйелдер, бұл жалпы құрамның 33,6%-ын құрайды. Сондай-ақ олардың арасында 13 жас өкіл бар, үлесі – 11,8%. Депутаттардың орташа жасы – 46,7 жас.
Сайлаудың түпкілікті қорытындысы бойынша «Әділет» 71,17% дауыс жинап, Құрылтайдағы 145 депутаттық мандаттың 110-ын иеленді.
Қазақстанның жаңа бір палаталы парламенті – Құрылтайдың алғашқы сайлауы 23 тамызда өтті. Құрылтай бес жыл мерзімге сайланды және 145 депутаттан тұрады. Депутаттар бірыңғай жалпыұлттық сайлау округі бойынша партиялық тізімдер негізінде пропорционалды өкілдік жүйесімен сайланды.
Қазақстан Президенті Қасым-Жомарт Тоқаев Құрылтайдың алғашқы сессиясын 28 тамызға шақырды.
Сайлауда ең көп дауыс жинаған «Әділет» партиясын бастамашыл топ 2026 жылғы сәуірде құрды. Мамыр айының басында Президент Әкімшілігінің бұрынғы басшысы Айбек Дәдебай партия төрағасы болып сайланды. Маусымда партия мемлекеттік тіркеуден өтті. Сол айдың ортасында өткен съезд шешімімен «Әділет» елдегі ең ірі билеуші партия – «Аманатты» өз құрамына қабылдады. «Аманат» бұған дейін «Нұр Отан» атауымен жұмыс істеген және Қазақстанның бұрынғы президенті Нұрсұлтан Назарбаевтың партиясы болған
