*** CENTCOM бұл әрекеттерді бітімді бұзу емес, қорғаныс шарасы деп атады***
Вашингтон. 26 мамыр. ИНТЕРФАКС – АҚШ әскері Иран Ислам революциясы сақшылар корпусының (ИРСК) екі катеріне және Иранның оңтүстігіндегі Бендер-Аббас ауданында орналасқан зениттік-зымыран кешенінің позициясына соққы жасады. Бұл туралы Fox News тілшісі хабарлады.
«Иранның екі катері Ормуз бұғазында мина орнату кезінде анықталды. (…) АҚШ әскері ИРСК-тің екі кемесін де жойып, америкалық әскери ұшақтарды нысанаға алған Бендер-Аббастағы зениттік-зымыран кешенінің позициясына соққы берді», – деп телеарна журналисі Дженнифер Гриффин X әлеуметтік желісінде әскери дереккөзге сілтеме жасап жазды.
Оның айтуынша, әскери өкілдер бұл соққылардың қорғаныс сипатында болғанын және АҚШ пен Иран арасындағы қолданыстағы атысты тоқтату режимін бұзу болып саналмайтынын мәлімдеген.
«Бұл шабуылдар қорғаныс мақсатында жасалды және бітімді бұзуға бағытталмаған», – деп атап өтті журналист.
АҚШ Қарулы күштері Орталық қолбасшылығының (CENTCOM) өкілі капитан Тим Хоукинс та оқиға болғанын растады. Оның айтуынша, соққылар Иран күштері тарапынан төнген қатерден америкалық әскерді қорғау мақсатында өзін-өзі қорғау аясында жасалған.
Ол шабуыл нысанасына зымыран ұшыру қондырғылары мен мина орнатуға әрекеттенген ирандық катерлер алынғанын нақтылады.
«Орталық қолбасшылық қазіргі бітім жағдайында ұстамдылық таныта отырып, өз күштерін қорғауды жалғастырады», – деді Хоукинс.
