Вашингтон. 17 қараша. ИНТЕРФАКС – АҚШ-тың Азаматтық авиация федералдық басқармасы (Federal Aviation Administration, FAA) дүйсенбі күні шатдаунға байланысты енгізілген ұшу шектеулерін алып тастайды, деп жазады The Wall Street Journal елдің көлік министрі Шон Даффи мен FAA әкімшісі Брайан Бедфордқа сілтеме жасап.
Өткен аптада енгізілген, елдің ең жүктемелі 40 әуежайының өткізу қабілетін 6%-ға қысқарту туралы талап АҚШ-тың шығыс жағалауы уақытымен таңғы 6:00-де (Мәскеу уақытымен 14:00-де) күшін жояды. Бұған дейін бұл шектеу 4% көлемінде болған.
Даффи мен Бедфордтың айтуынша, FAA қауіпсіздік жағдайын талдап, саланың кадрмен қамтамасыз етілу деңгейі жақсарғанын анықтаған.
Шатдаун кезінде диспетчерлік мұнаралар мен әуе қозғалысын басқару орталықтарында кадр тапшылығы күшейді. 1 қазаннан бастап авиадиспетчерлер жалақы алмағандықтан, кейбірі жұмысқа шықпаған.
Министрдің айтуынша, диспетчерлерге тиесілі еңбекақының 70%-ы шатдаун аяқталғаннан кейін екі күн ішінде, қалғаны шамамен бір апта ішінде төленеді.
“Енді біз назарымызды диспетчерлерді белсенді түрде жұмысқа қабылдауға және америкалық халық лайықты деп танитын заманауи әуе қозғалысын басқару жүйесін құруға аудара аламыз”, – деді Даффи.
Әуе компанияларының мәліметінше, қалыпты жұмыс режиміне толық оралу үшін бірнеше күн қажет болуы мүмкін.
