Мәскеу. 1 қазан. ИНТЕРФАКС – АҚШ Қаржы министрлігінің Шетелдік активтерді бақылау басқармасы (OFAC) венгриялық MOL компаниясына «Газпром нефть» құрамындағы сербиялық NIS компаниясын сатып алу жөніндегі келіссөздерді жалғастыруға берілген лицензияның мерзімін 30 қазанға дейін ұзартты. Бұл туралы MOL хабарлады.
Бұған дейін MOL компаниясының «Газпром нефтьпен» NIS-тегі 56,15% үлесті сатып алу жөнінде келіскені хабарланған. Кейін венгриялық компания NIS-тегі миноритарлық үлестің бір бөлігін БАӘ-нің ADNOC компаниясына сатуы мүмкін. Сонымен қатар Сербияға болашақта NIS-тегі үлесін 5 пайыздық тармаққа ұлғайту мүмкіндігі беріледі.
Сондай-ақ Сербия мен MOL NIS компаниясын болашақта басқару тәртібін айқындайтын акционерлік келісімге қол қойған. MOL мен «Газпром нефть» арасындағы NIS үлесін сатып алу-сату жөніндегі келіссөздер әлі жалғасып жатыр. Мәмілені аяқтау үшін сатып алу-сату шартына қол қоюдан бөлек, реттеуші органдардың қосымша рұқсаты қажет. Соның ішіндегі ең маңыздысы – америкалық OFAC-тың рұқсаты.
Бұған дейін OFAC сербиялық NIS компаниясына 30 қазанға дейін жұмыс істеуге мүмкіндік беретін жаңа лицензия берген.
2025 жылдың басында «Газпром нефтьтің» еншілес компаниясы саналатын NIS АҚШ-тың SDN санкциялық тізіміне енгізілген болатын. Сербия президенті Александр Вучич сол кезде АҚШ компания құрамынан Ресей капиталын толық шығаруды талап етіп отырғанын мәлімдеген.
Қазіргі уақытта NIS-тің негізгі акционері – 44,85% үлеске иелік ететін «Газпром нефть». Тағы 11,3% акция «Газпром капитал» ЖШҚ басқаруындағы «Интэлидженс» АҚ-ға тиесілі. «Газпромның» тікелей иелігінде NIS-тің бір акциясы бар. Сербия билігі компанияның 29,87% акциясына иелік етеді. Бұдан бөлек, NIS-тің миноритарлық акционерлері бар.
NIS – Сербияда көмірсутектерді барлау және өндірумен айналысатын жалғыз компания. Оған Панчево қаласындағы жылына 4,8 млн тонна мұнай өңдеуге қауқарлы зауыт та тиесілі. Компания Сербияның мұнай өнімдері нарығында жетекші орын алады. Оның жанармай құю станциялары көршілес Балқан елдерінде де жұмыс істейді, жалпы саны 400-ден асады.
