ВАШИНГТОН. 27 шілде. ИНТЕРФАКС – АҚШ Қорғаныс министрі Пит Хегсет Пентагонда Эстония Қорғаныс министрі Ханно Певкурмен, Латвия Қорғаныс министрі Андрис Спрудспен және Литва Қорғаныс министрі Довиле Шакаленемен өткізген кездесуде Балтық елдерінің қорғаныс саласындағы шығындарды ішкі жалпы өнімнің 5 пайызына дейін ұлғайтуға ниетті екенін оң қабылдады.
«Гаага саммитінде қабылданған қорғаныс шығындарын 5 пайызға дейін арттыру жөніндегі шешімнен кейін президент Трамптың НАТО-ны біріктірудегі тарихи жетістігі талқыланды. Бұл міндеттемені Балтық елдері 2026 жылы жүзеге асыруды көздеп отыр», – деп жазды Пит Хегсет X әлеуметтік желісінде.
Оның айтуынша, НАТО-ның әскери әлеуетін арттыруға және одақтың қорғаныс қабілетін нығайтуға бағытталған ортақ мақсаттарға қол жеткізу – мүше мемлекеттердің басымдығы. «Альянстың қуатты әрі тиімді құрылымын қалыптастыруға қосқан үлестері үшін Балтық елдерінің қорғаныс министрлеріне алғысымды білдіремін», – деді Хегсет.
Еске сала кетейік, маусым айында Гаагада өткен НАТО саммитінде альянсқа мүше мемлекеттер қорғаныс саласындағы шығындарды кезең-кезеңімен ұлғайтып, 2035 жылға қарай ЖІӨ-нің 5 пайызына дейін жеткізу жөнінде келісімге келген.
