Вашингтон. 4 қараша. INTERFAX – Белгілі республикашыл саясаткер, АҚШ-тың бұрынғы вице-президенті Дик Чейни 85 жасында қайтыс болды, деп хабарлады сейсенбі күні америкалық БАҚ.
«АҚШ-тың 46-вице-президенті Дик Чейни 2025 жылғы 3 қараша кешінде өмірден өтті. Оған 84 жас еді», – делінген саясаткердің отбасы таратқан мәлімдемеде.
Дик Чейни өзінің саяси мансабын 1960 жылдардың соңында бастаған. 1970–1980 жылдары АҚШ Конгресінің мүшесі болып қызмет етті. 1989 жылдан 1993 жылға дейін Джордж Буш-үлкеннің әкімшілігінде Пентагонды басқарды. Осы кезеңде ол Иракқа қарсы «Шөлдегі дауыл» атты әскери операцияны дайындауға қатысқан.
2001 жылдың қаңтарынан 2009 жылдың қаңтарына дейін Чейни Джордж Буш-кіші президент болған кезде АҚШ-тың вице-президенті қызметін атқарды. Америкалық бұқаралық ақпарат құралдарының пікірінше, ол бұл лауазымда болған ең ықпалды тұлғалардың бірі болды.
Чейни, әсіресе, елдің сыртқы саясатына белсенді араласқан саясаткер ретінде танылды. Ол халықаралық мәселелерді шешуде қарулы күш қолдануды жиі жақтап, неоконсерваторлар идеологиясына жақын саясаткер саналды. Ол 2003 жылы АҚШ пен оның одақтастарының Иракқа басып кіруінің басты жақтаушыларының бірі болды. Бұл операцияның ресми мақсаты – Саддам Хусейнді биліктен кетіру еді.
Сол кезде Чейни Хусейнде жаппай қырып-жою қаруы бар және оның «Әл-Каида» террористік ұйымымен байланысы бар деп мәлімдеген. Кейінірек бұл айыптаулардың шындыққа жанаспайтыны дәлелденді.
Джордж Буш-кіші әкімшілігінің өкілеттігі аяқталған соң Дик Чейни саясаттан кеткен. 2016 жылы ол Дональд Трамптың президенттікке кандидатурасын қолдағанымен, 2024 жылы оған қарсы шығып, демократтар атынан үміткер Камала Харриске дауыс беретінін мәлімдеді.
