Вашингтон. 9 мамыр. ИНТЕРФАКС — АҚШ-тың Иран порттарына жасаған әскери блокадасы Тегеранды мұнайдан түсетін маңызды табысынан айыруы мүмкін. Дегенмен, сарапшылар мен барлау мәліметтерімен таныс батыстық шенеуніктердің пікірінше, Иран билігі бұл қысымға үлкен экономикалық дағдарыссыз немесе мұнай кен орындарына елеулі зақым келтірмей-ақ бірнеше ай бойы шыдай алады. Бұл туралы NBC News хабарлады.
Телеканалдың еске салуынша, осыдан бір ай бұрын блокада басталғанда АҚШ Президенті Дональд Трамп пен оның әкімшілігіндегі жоғары лауазымды тұлғалар Иранның мұнай секторында дереу дағдарыс басталады деп болжаған еді. Трамп тіпті Иранның мұнай инфрақұрылымы үш күннің ішінде «жарылуы» мүмкін екенін, себебі экспорт тоқтаған соң ұңғымалардан алынған мұнайды сақтайтын жер қалмайтынын айтқан болатын.
Алайда бұл сценарий іске асқан жоқ. NBC News дереккөздері әскери-теңіз блокадасы ондаған ирандық танкердің Ормуз бұғазы арқылы өтуіне кедергі келтіргенімен, жағдай Трамп айтқандай шұғыл сипат алмағанын көрсетіп отыр.
Ақ үй өкілдерінің айтуынша, блокаданың мақсаты — Иран мұнайының экспортын тоқтату арқылы Тегеранды келіссөз үстеліне отыруға және АҚШ талаптарына көнуге мәжбүрлеу.
Сарапшылардың пайымдауынша, Иран блокада салдарынан мұнай өндіруді біртіндеп азайта бастаған. Таяу екі айда мұнай қоймалары толып, кейбір ұңғымаларды жабуға мәжбүр болуы мүмкін. Бірақ талдаушылардың көбі Иран бұдан қашып құтыла алады деп санайды. Себебі өндірілген мұнайдың едәуір бөлігі ел ішінде тұтынылуы мүмкін, бұл кен орындарының жұмысын жалғастыруға мүмкіндік береді.
«Оларға өндірістің шамамен жартысын тоқтатуға тура келеді. Бірақ мұнайды ел ішінде өңдей алатындықтан, жұмыс толық тоқтамайды», — дейді Колумбия университетінің сарапшысы әрі «Qamar Energy» консалтингтік фирмасының бас директоры Робин Миллс.
«Eurasia Group» сараптамалық орталығының маманы Грегори Брю Иранның мұнай өндірісін азайту бойынша тәжірибесі бар екенін айтады. Оның сөзінше, соңғы 15 жылда Иран АҚШ санкцияларына байланысты екі рет өндірісті қысқартуға мәжбүр болған.
«Бұл олардың инфрақұрылымына орасан зор зиян келтіреді деп ойламаймын. Олар мұны қалай жасау керектігін біледі, бұрын да жасаған», — деді Брю.
Оның айтуынша, Иран блокадаға бейімделіп үлгерген: танкерлерге тиелетін мұнай көлемі аптасына 11 миллион баррельден 6-8 миллион баррельге дейін азайтылды.
