Дели. 9 мамыр. ИНТЕРФАКС — Үндістан бірнеше ядролық оқтұмсықпен жабдықталған «Agni» баллистикалық зымыранын сәтті сынақтан өткізді. Бұл туралы сенбі күні Үндістан Қорғаныс министрлігі хабарлады.
Жеке бағытталатын блоктары бар нысаналы оқтұмсықпен жабдықталған зымыран кеше Бенгал шығанағындағы Абдул Калам аралында орналасқан полигоннан ұшырылды.
«Үндістан 8 мамырда Орисса штатындағы Абдул Калам аралынан ұшырылған, жеке бағытталатын нысаналы оқтұмсықтармен (MIRV) жарақталған жетілдірілген «Agni» зымыранына сәтті сынақ жүргізді», — делінген ресми мәлімдемеде.
Қорғаныс министрлігі оқтұмсықтар бөлінгеннен кейін оқу-жаттығу блоктары Үнді мұхиты аймағындағы әртүрлі нысаналарға бағытталғанын атап өтті.
Жергілікті БАҚ-тың мәліметінше, баллистикалық зымыран Үнді мұхитының үстімен оңтүстікке қарай шамамен 3,5 мың шақырымды ұшып өткен.
Қазіргі уақытта Үндістанның қарулы күштерінде ұшу қашықтығы әртүрлі «Agni» зымырандары бар: «Agni-I» (750 км), «Agni-II» (2 мың км), «Agni-III» және «Agni-IV» (4-4,5 мың км) және «Agni-V» (5 мың км). Бұл зымырандардың барлығы ядролық оқтұмсық тасымалдауға қауқарлы.
