Вашингтон. 7 қыркүйек. ИНТЕРФАКС-ҚАЗАҚСТАН – АҚШ президенті Дональд Трамп алдағы қазан айының соңында Оңтүстік Кореяның Кенджу қаласында өтетін Азия-Тынық мұхиты экономикалық ынтымақтастығы (АТЭС) саммиті аясында Қытай Халық Республикасының төрағасы Си Цзиньпинмен кездесу мүмкіндігін қарастырып жатыр. Бұл туралы CNN телеарнасы сенімді дереккөздерге сілтеме жасап хабарлады.
Телеарна мәліметінше, АТЭС саммиті шеңберінде екіжақты кездесу өткізуге қатысты белсенді талқылаулар жүріп жатыр, алайда әзірге нақты жоспар бекітілмеген.
CNN атап өткендей, өткен айда Си Цзиньпин мен Дональд Трамп арасындағы телефон арқылы сөйлесу барысында ҚХР төрағасы АҚШ президенті мен оның жұбайын Қытайға ресми сапармен келуге шақырған. Өз кезегінде Трамп бұл ұсынысты қолдап, жауап ретінде Қытай көшбасшысын да АҚШ-қа шақырғанымен, нақты күндер келісілген жоқ.
Телеарна сарапшыларының пікірінше, АҚШ президентінің Азия аймағына сапары Солтүстік Корея көшбасшысы Ким Чен Ынмен де қайта жүздесуге мүмкіндік беруі мүмкін. Алайда CNN дереккөздері қазіргі таңда Си Цзиньпинмен кездесуге дайындық басым бағыттардың бірі ретінде қарастырылып жатқанын атап өтті.
Еске салайық, АТЭС саммиті 2025 жылдың қазан айының соңында Оңтүстік Кореяның Кенджу қаласында өтеді.
