Брюссель, 9 маусым. ИНТЕРФАКС — Израиль мен Ливан арасындағы атысты тоқтату туралы келісім қақтығысты тоқтатып, тараптар арасындағы келіссөздерді сындарлы арнаға қайта бағыттауға мүмкіндік береді. Бұл туралы Еуроодақтың сыртқы саясат және қауіпсіздік мәселелері жөніндегі дипломатия басшысы Кая Калластың ресми өкілі Ануар әл-Ануни мәлімдеді.
Брюссельде өткен брифингте ол Еуроодақтың Ливандағы жағдайға қатысты ұстанымын түсіндіре отырып, барлық тараптарды келісім талаптарын толық орындауға шақырды.
«Барлық қатысушыларды келісімнің ережелерін толық сақтауға үндейміз. Әскери іс-қимылдардың барлығы тоқтатылуы тиіс. Біз «Хезболланы» Литани өзенінің оңтүстігіндегі аумақтан кетуге, ал Израильді Ливан аумағынан әскерін шығаруға шақырамыз», – деді ол.
Әл-Ануни жуырда Еуропалық бейбітшілік қоры Ливанның қарулы күштерін қолдау және олардың әлеуетін нығайту мақсатында 100 миллион еуро көлемінде көмек бөлгенін еске салды. Бұл шара елдегі қауіпсіздік пен тұрақтылықты күшейтуге бағытталған.
Сондай-ақ Еуроодақ өкілі БҰҰ Қауіпсіздік Кеңесінің Ливанның егемендігі мен аумақтық тұтастығын құрметтеуге шақыратын 1701-қарарының толық орындалуын талап ететінін атап өтті.
Сонымен қатар «Әл-Джазира» телеарнасы Ливан Денсаулық сақтау министрлігіне сілтеме жасап, 2 наурыздан бері Израиль әскери күштерінің Ливан аумағына жасаған соққылары салдарынан кемінде 3,6 мың адамның қаза тапқанын хабарлады.
Министрлік мәліметінше, осы кезеңде 11,3 мыңнан астам адам жарақат алған.
Бұқаралық ақпарат құралдары Израильдің Ливан аумағына, соның ішінде Тир қаласына соққы жасауды жалғастырып отырғанын атап өтуде. Ежелгі Тир қаласы ЮНЕСКО-ның Бүкіләлемдік мұралар тізіміне енгізілген.
Бұған дейін АҚШ-тың арағайындығымен Израиль мен Ливан атысты тоқтату режимін сақтау жөнінде келісімге келген болатын. Келісім шарттарының бірі – «Хезболла» тарапынан шабуылдардың толық тоқтатылуы. Алайда қозғалыс келіссөздерге қатыспағандықтан, бұл міндеттемелерді ресми түрде өз мойнына алған жоқ.
