Астана, 9 маусым. ИНТЕРФАКС-ҚАЗАҚСТАН — Қазақстан Республикасы Премьер-министрінің орынбасары – Сыртқы істер министрі Ермек Көшербаев АҚШ президентінің Оңтүстік және Орталық Азия жөніндегі арнайы өкілі, АҚШ-тың Үндістандағы елшісі Серджио Гормен Астанада кездесу өткізді. Бұл туралы сейсенбі күні ҚР Сыртқы істер министрлігінің баспасөз қызметі хабарлады.
Кездесу барысында тараптар екіжақты күн тәртібіндегі өзекті мәселелердің кең ауқымын талқылады. Әсіресе экономикалық және инвестициялық серіктестікті дамытуға, инновациялар мен жасанды интеллект саласындағы ынтымақтастыққа, сондай-ақ білім мен ғылым бағытындағы өзара іс-қимылға ерекше назар аударылды.
Сонымен қатар көлік, логистика және стратегиялық маңызы бар минералдар саласындағы әріптестіктің келешегі қарастырылды.
Ермек Көшербаев Астана Вашингтонды инвестиция тарту, технологиялық жаңғыру және сауда-экономикалық байланыстарды тереңдету бағытындағы негізгі серіктестердің бірі ретінде қарастыратынын атап өтті. Осы тұрғыда тараптар 2025 жылғы қарашада Ақ үйде өткен кездесу барысында Қазақстан Президенті Қасым-Жомарт Тоқаев пен АҚШ Президенті Дональд Трамп арасында қол жеткізілген келісімдердің орындалу барысын нақты талқылады.
Сыртқы істер министрі АҚШ тарапына алдағы уақытта өтетін «C5+1» (Орталық Азия елдері мен АҚШ) форматындағы маңызды минералдар жөніндегі диалогқа жоғары деңгейде қатысатыны үшін алғыс білдірді.
Бұдан бөлек, тараптар АҚШ пен Орталық Азия елдерінің бизнес-делегациялары қатысатын жоспарланған дөңгелек үстелдің маңыздылығын атап өтті. Бұл іс-шара сауда-экономикалық ынтымақтастықты одан әрі дамытуға қосымша серпін береді деп күтілуде.
Өз кезегінде Гор екіжақты және өңірлік күн тәртібінің барлық бағыттары бойынша белсенді диалог пен практикалық өзара іс-қимылды жалғастырудың маңызын растады.
Келіссөздер қорытындысы бойынша тараптар кеңейтілген стратегиялық серіктестікті одан әрі нығайтуға дайын екенін мәлімдеді.
