Еуроодақ Украинаға көмек беру үшін Ресейдің бұғатталған активтерін пайдалану бойынша нақты шешімге келген секілді. Бұл туралы Польшаның сыртқы істер министрінің орынбасары Игнаций Немчицкий мәлімдеді. Оның айтуынша, бұл – «репарациялық несие» тетігі, яғни Украина ЕО-дан несие түрінде қаржы алады, ал ол қаражат Ресей Орталық банкінің Еуроодақ аумағында бұғатталған активтерінен алынады.
Қазіргі таңда бұл активтердің көп бөлігі Бельгияда орналасқан Euroclear қаржы ұйымында сақталған. Аталған несие Украинаға беріледі, ал оның қайтарымы соғыс аяқталған соң жүзеге асады.
Еурокомиссияның есебінше, жаңа қаржылық тетік 2026 жылдан бастап үш жыл ішінде Украинаға жыл сайын шамамен 45 миллиард еуро көлемінде көмек көрсетуге мүмкіндік береді. Сонымен қатар, бұл несие ЕО елдерінің мемлекеттік кепілдіктерімен қамтылып, Ресей активтері қандай да бір себеппен босатылған жағдайда Еуроодақты қаржылық қауіптерден сақтандыру көзделіп отыр.
«Біз Еуроаймақ елдерінің кейбірі заң бұзбай, ережелер шеңберінен шықпауға тырысатынын түсінеміз. Бірақ сонымен қатар Украинаға нақты көмек қажет. Осыны ескере келе, біз бәріне тиімді шешім таптық», – деді Немчицкий.
Ол бұл мәселе талқылау деңгейінен нақты іске көшу сатысына жақындап қалғанын айтып, процесті сабырмен қабылдауға шақырды. Бұған дейін ЕО-ның сыртқы саясат бойынша өкілі Кая Каллас та Украинаға көмек көрсету тетігі бойынша айтарлықтай алға жылжу бар екенін айтқан. Оның айтуынша, бұл мәселе 23 қазанда өтетін ЕО саммитінде ресми түрде жариялануы мүмкін.
