Вашингтон. 28 тамыз. ИНТЕРФАКС — Франция, Германия және Ұлыбритания бейсенбі күні Тегеранға қарсы БҰҰ Қауіпсіздік Кеңесінің санкцияларын қайта енгізу механизмін іске қоспақ. Бұл туралы Axios порталы хабарлады.
Портал дерегінше, «Евроүштік» көшбасшылары Иранның 2015 жылғы Бірлескен жан-жақты іс-қимыл жоспары (БЖЖҚЖ) аясындағы міндеттемелерін бірнеше жылдан бері ашық түрде бұзып келе жатқанын және жағдайды түзетуге нақты қадамдар жасамағанын алға тартуда.
Алайда, еуропалық дипломаттың айтуынша, бұл шешім дипломатиялық ықпалдастықтың аяқталғанын білдірмейді. «Евроүштік» елдері БҰҰ санкциялары күшіне енгенге дейінгі бірнеше апта ішінде Иранмен келіссөздер жүргізуге әзір екендерін жеткізген.
Санкцияларды қалпына келтіру тетігін іске қосу процесі 30 күнге созылады. Еуропалық тараптар бұл кезеңді БҰҰ Қауіпсіздік Кеңесіне қазан айында Ресей төрағалық етпей тұрып аяқтауды көздеп отыр.
Бұған дейін «Евроүштік» егер Иран ядролық бағдарламасына қатысты дипломатиялық келісімге келмесе, тамыз айының соңына дейін шұғыл әрекет ету механизмін іске қосатынын ескерткен еді.
Өз кезегінде Иран Сыртқы істер министрінің орынбасары Казем Гарибабади егер бұл тетік іске қосылса, Тегеран МАГАТЭ-мен өзара іс-қимылды тоқтататынын мәлімдеді.
Еске салайық, БЖЖҚЖ-ны мақұлдаған БҰҰ ҚК резолюциясы шеңберінде көзделген бұл механизм кез келген қатысушы тарапқа Иранның келісімді бұзғанын алға тартып, ресми шағым түсіруге мүмкіндік береді. Егер 30 күн ішінде келісімге келу мүмкін болмаса, бұған дейін тоқтатылған санкциялар автоматты түрде қайта күшіне енеді. Бұған қару-жарақ эмбаргосы, жүктерді тексеру және зымыран бағдарламасына қатысты шектеулер кіреді.
