ДУБАЙ. 7 қыркүйек. ИНТЕРФАКС — Иран мен Оман Ормуз бұғазы арқылы кемелердің қауіпсіз өтуіне арналған жаңа бағытты өзара мақұлдады. Жаңа тәртіп таяу күндері жарияланады. Бұл жөнінде Иранның Ұлттық қауіпсіздік жоғары кеңесінің хатшысы Мохсен Резаи мәлімдеді.
«Оманмен ортақ келісімге келдік. Иранның бақылауындағы жаңа халықаралық теңіз жолы таяу күндері жарияланады», — деді Резаи Иранның мемлекеттік БАҚ-тарына берген сұхбатында.
Оның айтуынша, Тегеран Ормуз бұғазының сырт жағынан арнайы аймақ белгілеуді де жоспарлап отыр. Ол жерге Иранның рұқсатынсыз кірген кемелерге шектеу қолданылады.
Резаи мұндай кемелердің санкциялық тізімге енгізілетінін ескертті.
Жаңа аймақ АҚШ Әскери-теңіз күштері бақылауға алған аумақтан басталып, Парсы шығанағының бір бөлігі мен жүк тиеу порттарына дейін созылмақ.
Резаи Ормуз бұғазы қазір толық жабық әрі Иран Қарулы күштерінің бақылауында екенін мәлімдеді. АҚШ президентінің бұған қатысты айтқандарын ол шындыққа жанаспайды деп бағалады.
«Америкалықтар бес-алты кемені жасырын өткізуге әрекет жасап жүр. Мұның шығыны да көп. Оның үстіне мұндай кемелер жиі шабуылға ұшырайды», — деді Резаи.
Оның айтуынша, Иран америкалық кемелерді суға батырмауды жөн көрген. Себебі олардың бірқатары мұнай тасымалдайды. Мұндай кемелердің суға кетуі Парсы шығанағының экологиясына елеулі зиян келтіруі мүмкін.
Резаи Вашингтон қысым мен күш көрсету саясатынан бас тартып, Иранның сеніміне ие болмайынша, Тегеран Ормуз бұғазын ашуға уәде бермейтінін айтты.
«Келіссөзді жалғастыру үшін АҚШ алдымен Иранның сеніміне ие болуы керек», — деді ол.
Оның сөзінше, АҚШ тарапынан қауіп төнбеген жағдайда Иран да Ормуз бұғазындағы кеме қатынасына бөгет жасамайды.
Резаи АҚШ санкцияларынан кейін Иранда тауар тапшылығы басталды деген ақпаратты да жоққа шығарды. Ол мұнай саудасы тоқтамағанын, одан түскен қаражат елге түсіп жатқанын және негізгі тауарлар қоры жеткілікті екенін айтты.
