Дубай. 8 ақпан. ИНТЕРФАКС — Иран АҚШ-пен жүргізіліп жатқан келіссөздер барысында уранды байытудан толық бас тарту талабына келіспейді. Бұл туралы жексенбі күні Иранның сыртқы істер министрі Аббас Аракчи мәлімдеді.
«Біз уранды әрдайым тек бейбіт мақсатта байытып келеміз және бұл ұстаным өзгермейді. Сенімді нығайтуға бағытталған шараларды талқылауға дайынбыз. Алайда уранды байытудан толық бас тарту талабын қабылдамаймыз», — деп министрдің сөзін «Мехр» агенттігі келтіреді.
Аракчи Тегеран АҚШ-пен ядролық мәселе бойынша өткен соңғы келіссөздер раундын талдап, одан әрі байланыстарды жалғастырудың орындылығы жөнінде шешім қабылдайтынын тағы да атап өтті.
«Бұл раунд, негізінен, қарсы тарапқа сенім артуға бола ма, соны анықтау үшін қажет болды. Біздің әріптестеріміз де келіссөздерге қаншалықты байыппен қарайтынымызды бағалағанын айтты», — деді ол. Сондай-ақ Аракчи Маскатта өткен келіссөздердің тек ядролық тақырыпқа арналғанын тағы бір мәрте растады.
Иран СІМ басшысының пікірінше, АҚШ-пен келісімге «ешбір тарап шамадан тыс талаптар қоймаған жағдайда» қол жеткізуге болады. «Бір-бірін құрметтей отырып, өзара тиімді ортақ тұстарды іздеу қажет», — деді ол.
