Дубай. 11 шілде. ИНТЕРФАКС – Иранның Жоғарғы көшбасшысы аятолла Моджтаба Хаменеи әкесі, аятолла Әли Хаменеидің қазасы жауапсыз қалмайтынын мәлімдеді.
«Қасиетті көшбасшымыздың және осы соғыстарда зұлым әрі ар-ожданнан жұрдай қанішерлердің қолынан қаза тапқан барлық шейіттердің төгілген қаны үшін кек алуға ант етеміз», – деп келтіреді Press TV телеарнасы аятолланың мәлімдемесінен үзінді.
Оның айтуынша, Әли Хаменеидің өліміне жауаптылар «өз төсегінде бейбіт жағдайда көз жұмады деп үміттенбеуі керек». Сондай-ақ бұл мақсатқа қол жеткізу қазіргі Жоғарғы көшбасшының немесе өзге де ресми тұлғалардың оқиға орнында болуына байланысты емес екенін атап өтті.
Моджтаба Хаменеи Иран мен Иракта өткен аза тұту рәсімдеріне халықтың жаппай қатысуын жоғары бағалап, мұны тарихи маңызы бар қолдау әрі Тегеранның қарсыластарына жолданған белгі деп атады.
Жұмаға қараған түні Иранның Мешхед қаласында ақпан айында АҚШ пен Израильдің әуе шабуылдары кезінде қаза тапқан Әли Хаменеиді жерлеу рәсімі аяқталды. Жоғарғы көшбасшыны еске алуға арналған аза тұту шаралары өткен жұмадан бері Иранның Тегеран және Кум қалаларында, сондай-ақ Ирактағы шиит мұсылмандары үшін қасиетті Эн-Наджаф пен Кербела қалаларында өтті. Ирандық бұқаралық ақпарат құралдарының мәліметінше, осы күндері өткен қаралы рәсімдер мен шерулерге шамамен 41–43 миллион адам қатысқан.
Өткен бейсенбіде The Wall Street Journal басылымы дереккөздерге сілтеме жасап, Израиль АҚШ-қа Иранның АҚШ президенті Дональд Трампқа қастандық жасаудың жаңа жоспарын қарастырып жатқаны туралы барлау мәліметтерін ұсынғанын хабарлады. Басылым Иранның АҚШ президенті қызметіндегі алғашқы мерзімінде Дональд Трамптың пәрменімен Ислам революциясы сақшылары корпусының ықпалды генералы Қасем Сүлейманидің өлтірілуі үшін кек алатынын бірнеше жылдан бері ашық айтып келе жатқанын еске салды.
