Иерусалим. 26 қазан. ИНТЕРФАКС – Израиль 27 қазанда өтетін парламент сайлауы аяқталғанға дейін Иранға соққы беруді қайта бастамайды. Бұл туралы дүйсенбі күні Израильдің Қорғаныс министрі Исраэль Кац мәлімдеді.
«Ашық айтамын, Израильде сайлау өткенге дейін Иранға шабуыл жасау жоспарымызда жоқ. Алайда Иран Израильге шабуыл жасаса, оған жойқын соққымен жауап береміз», – деп келтіреді министрдің сөзін The Times of Israel басылымы.
Кац Израиль Қорғаныс армиясы Бас штабының бастығы, генерал-лейтенант Эяль Замир мен елдің саяси басшылығы арасында Иранға қатысты әскери іс-қимыл жөнінде келіспеушілік бар деген ақпаратты да жоққа шығарды.
Бұған дейін Израильдің ақпарат құралдары Замир мен премьер-министр Биньямин Нетаньяху арасында пікір қайшылығы туындағанын хабарлаған еді. Мәліметтерге қарағанда, Нетаньяху белгілі бір әскери операция жүргізуді талап еткен. Ал әскери басшылық мұндай әрекет Израильдегі парламент сайлауы қарсаңында Иранмен арадағы қақтығысты ушықтыруы мүмкін деп есептеген.
CNN телеарнасы өз дереккөздеріне сүйеніп, АҚШ әкімшілігі Израильге америкалық әскердің Иранға қайта соққы беруге әзір емес екенін жеткізгенін хабарлады. Вашингтон әскери дайындыққа қосымша уақыт қажет екенін түсіндірген.
«Нетаньяху Иранға қарсы бірлескен әскери операция жүргізуге ерекше мүдделі болды. Ол АҚШ президенті Дональд Трампты Израильдегі сайлауға дейін операцияны бастауға көндіруге тырысты. Алайда АҚШ басшысы бұл ұсынысты қолдамады», – деді CNN телеарнасына Израильдің қауіпсіздік саласындағы дереккөзі.
Сонымен қатар CNN тілдескен дереккөздердің бірі АҚШ пен Израильдің Иранға қарсы бірлескен әскери операциясының жоспары әзір екенін мәлімдеді. Оның айтуынша, операция 3 қарашада өтетін АҚШ Конгресі сайлауынан кейін жүзеге асырылуы мүмкін.
