Брюссель. 26 қазан. ИНТЕРФАКС – Суданның мемлекеттік энергетикалық компаниясы Жедел әрекет ету күштері (ЖӘК) елдің оңтүстік-шығысындағы электр станцияларына ұшқышсыз ұшу аппараттарымен шабуыл жасағанын мәлімдеді. Соның салдарынан өңірде электр қуатын беру тоқтаған. Бұл туралы Батыс ақпарат құралдары хабарлады.
Судан билігінің мәліметінше, Сеннар, Гедареф, Ақ Ніл және Әл-Гезира провинциялары электр жарығынсыз қалған. Шабуылдар елдің бірыңғай электр жүйесінің тұрақты жұмысына да қауіп төндірген.
Синджа, Әл-Хавата, Әл-Фао, Машкура және Әл-Джунайда қалаларындағы электр станциялары шабуылға ұшырады. Энергетикалық компанияның хабарлауынша, нысандарға айтарлықтай зақым келіп, ондағы жабдықтар қатты бүлінген.
БАҚ мәліметінше, электр қуатының жаппай өшуі Судан армиясының бақылауындағы аумақтың шамамен жартысын қамтыған. Жедел әрекет ету күштері әзірге бұл ақпаратқа түсініктеме берген жоқ.
Суданның Қарулы күштері мен Жедел әрекет ету күштері арасындағы қарулы қақтығыс 2023 жылғы 15 сәуірден бері жалғасып келеді. Соғыс салдарынан кемінде 150 мың адам қаза тауып, 14 миллионнан астам тұрғын баспанасын тастап кетуге мәжбүр болған.
Қазіргі уақытта Судан армиясы елдің солтүстік және шығыс бөлігін, соның ішінде қарсылас күштерден қайтарып алған астана Хартумды бақылауда ұстап отыр. Ал Жедел әрекет ету күштері елдің оңтүстігі мен Дарфур өңірін бақылауына алған.
Батыс ақпарат құралдары қақтығысушы тараптардың ұшқышсыз ұшу аппараттарын бұрынғыдан жиі қолдана бастағанын атап өтеді. Атап айтқанда, Судан армиясы Оңтүстік Дарфур провинциясындағы Ньяла қаласына дрондармен шабуыл жасап жүр. Бұл қалада Жедел әрекет ету күштері құрған, өзін-өзі жариялаған әкімшілік орналасқан.
Өз кезегінде Жедел әрекет ету күштері қазан айында Хартум әуежайына ұшқышсыз ұшу аппараттарымен соққы берген.
