МАДРИД. 2 қыркүйек. ИНТЕРФАКС — Конго Демократиялық Республикасында (КДР) Эбола вирусын жұқтыру салдарынан қайтыс болғандар саны 3 мыңнан асты. Бұл туралы елдің Ұлттық қоғамдық денсаулық сақтау институтының деректеріне сілтеме жасаған EFE агенттігі хабарлады.
Ведомствоның соңғы есебіне сәйкес, індеттен 3007 адам көз жұмған. Өлім-жітім деңгейі 48,6%-ды құрады.
1,4 мыңнан астам науқас сауығып шыққан, тағы 830 адам ауруханада ем қабылдап жатыр.
Вирустың таралуына қарсы шаралар Конгоның алты провинциясында жалғасып жатыр. Қазіргі індет алғаш тіркелген Итуриде кейінгі тәулікте жаңадан 49 адамнан вирус анықталды. Бұл — ел бойынша ең жоғары көрсеткіш. Бұдан бөлек, Чопо, Төменгі Уэле, Жоғарғы Уэле, Солтүстік Киву және Оңтүстік Киву провинцияларында да індет әлі басылған жоқ.
Бұған дейін КДР Эболаға қарсы Ervebo вакцинасымен жаппай иммундау науқанын бастаған. Вакцина бастапқыда вирустың Заир нұсқасына қарсы әзірленгенімен, қазіргі Бундибуйо штамына қарсы да оң нәтиже көрсеткен.
Эбола індетінің басталғаны 15 мамырда Конгоның Итури провинциясында ресми түрде жарияланды. Кейін вирус елдің басқа өңірлеріне, сондай-ақ шекаралас Угандаға тарады. Өткен аптада Дүниежүзілік денсаулық сақтау ұйымы (ДДҰ) Угандада аурудың таралуы тоқтағанын мәлімдеді.
ДДҰ қазіргі індетті тарихтағы ең жылдам таралған Эбола өршуі деп бағалады. Ұйымның мәліметінше, оның ауқымы он жыл бұрын 11 мыңнан астам адамның өмірін қиған ең ірі Эбола эпидемиясынан да асып түсуі мүмкін.
