Дубай. 17 сәуір. ИНТЕРФАКС – The New York Times мәліметінше, Хезболла қозғалысы мен Израиль арасындағы атысты тоқтату келісімі күшіне енгеннен кейін Ливанның оңтүстігінен кеткен тұрғындар үйлеріне қайта орала бастады.
Басылымның хабарлауынша, бітім жарияланған соң мыңдаған отбасы елдің оңтүстігіне апаратын негізгі тасжолға ағылған. Алайда израильдік әскерилер Эль-Литани өзенінен оңтүстікке өтетін жолдарды байланыстыратын екі көпірді қиратқандықтан, көліктер лайлы өткел арқылы кезекпен ғана өтуде.
Әсіресе қозғалыс Сайда қаласы маңында күшейген. Жолдарда ұзын-сонар кептеліс қалыптасып, кейбір көліктерде «Хезболла» тулары ілінген.
Ал Бейрут қаласында тұрғындар бітімді атап өтіп, қуаныштарын білдірген.
Басылымның дерегінше, соңғы қақтығыстар салдарынан Ливанда 1 миллионнан астам адам өз үйлерін тастап кетуге мәжбүр болған.
Касмие ауданында ливандық әскерилер экскаваторлардың көмегімен Эль-Литани өзені арқылы өтетін көпірді қалпына келтіруде. Бұл көпір елдің солтүстігі мен оңтүстігін жалғайды.
Соңғы бір жарым ай ішінде Израиль әскері аталған өзендегі негізгі көпірлердің барлығына дерлік соққы жасаған. Бейсенбі күні, бітім жарияланардан бірнеше сағат бұрын, Касмие ауданындағы көпірге тағы да соққы берілген.
Басылымның атап өтуінше, Израильдің кейбір тұрғындары бітімге наразылық білдіріп, «Хезболла» тарапынан қауіп толық жойылмағанын айтқан. Ливанда да жағдайдың әрі қарай қалай өрбитініне қатысты белгісіздік сақталып отыр. Негізгі сұрақ – атысты тоқтату режимі қаншалықты сақталады.
Өз кезегінде «Хезболла» бітімнің басталғанын растағанымен, оны толық сақтайтыны туралы нақты мәлімдеме жасаған жоқ. Сонымен қатар ұйым оңтүстік Ливан тұрғындарын Израиль соққыларына ұшыраған аймақтарға жақындамауға шақырды, Израиль келісімдерді жиі бұзады деп мәлімдеді.
Ливан армиясы да түн ортасына қарай Израиль тарапынан бірнеше «агрессия әрекеті» жасалып, бітім шарттары бұзылғанын хабарлаған.
Бұған дейін АҚШ президенті Дональд Трамп Израиль мен Ливан арасында 10 күндік атысты тоқтату келісімі жасалғанын мәлімдеген болатын. Бұл келісім жұмаға қараған түні күшіне енді.
