Астана. 17 маусым. ИНТЕРФАКС-ҚАЗАҚСТАН – Парламент Мәжілісі сәрсенбі күні өткен жалпы отырыста Қазақстан Республикасы мен Халықаралық қайта құру және даму банкі арасындағы «Экономиканың инклюзивті және орнықты өсімін қолдауға арналған даму саясатын қаржыландыру жөніндегі екінші қарыз» туралы келісімді, сондай-ақ Қазақстан Республикасы мен Азия инфрақұрылымдық инвестициялар банкі арасындағы «Инклюзивті және орнықты экономикалық өсім бағдарламасы» бойынша қарыз келісімін ратификациялау туралы заңдарды қабылдады.
Қаржы министрі Мәди Такиевтің айтуынша, жалпы сомасы 154,7 млрд жапон иенасын құрайтын қарыз келісімдеріне биылғы 20 мамыр мен 15 маусым күндері қол қойылған.
«Қарыз валютасы ретінде жапон иенасының таңдалуы Жапониядағы базалық пайыздық мөлшерлемелердің төмен деңгейімен, сондай-ақ теңге мен иена бағамдарының өзара байланысымен түсіндіріледі», – деді министр.
Оның сөзінше, тартылатын қаражат Үкіметтің бірқатар бастамаларын, соның ішінде экономиканың маңызды бағыттарын қаржыландыруға мүмкіндік береді.
«Аталған қаржы институттарының қарыздары 11 жыл мерзімге беріледі, оның ішінде бес жылдық жеңілдік кезеңі қарастырылған. Қарыздар бойынша міндеттемелер келісімдерде көзделген қаржылық шарттарға сәйкес республикалық бюджет қаражаты есебінен орындалады», – деді Мәди Такиев.
Қарыздар бойынша сыйақы мөлшерлемесі TONA көрсеткіші мен өзгермелі спрэд негізінде айқындалады. Сонымен қатар қарыз сомасының 0,25 пайызы көлемінде біржолғы комиссия және игерілмеген қаражат қалдығына жылдық 0,25 пайыз мөлшерінде резервтеу комиссиясы көзделген.
Қабылданған заңдар енді Сенаттың қарауына жіберіледі.
