Астана. 17 маусым. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев «Қазақстан Республикасы Үкіметі мен Біріккен Ұлттар Ұйымы арасындағы Қазақстан Республикасында Орталық Азия мен Ауғанстан үшін Біріккен Ұлттар Ұйымының Тұрақты даму мақсаттары жөніндегі өңірлік орталығын құру туралы келісімді ратификациялау туралы» заңға, сондай-ақ осы мәселеге қатысты өзара түсіністік туралы меморандумды ратификациялау жөніндегі заңға қол қойды. Бұл туралы Президенттің баспасөз қызметі хабарлады.
Келісімнің мақсаты – Қазақстан аумағында Орталық Азия мен Ауғанстанға арналған БҰҰ-ның Тұрақты даму мақсаттары жөніндегі өңірлік орталығын құрудың құқықтық негізін қалыптастыру.
Орталық өңір елдеріне экономикалық, әлеуметтік және экологиялық бағыттардағы тұрақты даму мақсаттарына қол жеткізуге қолдау көрсетеді.
Сонымен қатар жаңа құрылым өңірлік жобалар мен бағдарламаларды іске асырып, БҰҰ жүйесінің ұйымдары, халықаралық қаржы институттары, жеке сектор және азаматтық қоғам арасындағы өзара іс-қимылды нығайтуға және үйлестіруге ықпал етеді. Бұдан бөлек, ол теңізге тікелей шығатын жолы жоқ дамушы мемлекеттерге арналған 2024–2034 жылдарға арналған іс-қимыл бағдарламасын жүзеге асыруға өз үлесін қоспақ.
Келісімге сәйкес, БҰҰ қызметкерлеріне халықаралық құқық нормаларына сай артықшылықтар мен иммунитеттер беріледі. Сондай-ақ қазақстандық тарап Орталық қызметкерлері мен олардың отбасы мүшелері үшін виза рәсімдеу және еңбек қызметіне қатысты рәсімдерді жеңілдетуді қамтамасыз етеді.
Құжатта Қазақстандағы Орталық Азия мен Ауғанстанға арналған БҰҰ өңірлік орталығын қаржыландыру тетіктері де айқындалған.
Меморандум аясында Орталық жанынан консультативтік кеңес пен халықаралық консультативтік комитет құру жоспарланып отыр. Бұл құрылымдар өңірлік бағдарламалардың басым бағыттарын айқындап, Орталықтың жұмыс жоспары мен бюджетіне қатысты ұсынымдар әзірлейді.
