Мәскеу. 10 наурыз. ИНТЕРФАКС – 6–9 наурыз аралығында Ормуз бұғазын тек екі мұнай танкері мен бір мұнай өнімдерін тасымалдайтын кеме кесіп өткен. Ал Парсы шығанағындағы танкерлердің шамамен 77%-ы әлі де якорьда тұр немесе порт терминалдарының айлақтарына байланған. Бұл туралы теңіз кемелерінің қозғалысын бақылау сервистері негізінде дайындалған «Эйлер Аналитикалық технологиялар» АҚ мониторингінде айтылған.
Сарапшылардың есебінше, Парсы шығанағындағы танкерлердегі көмірсутектер көлемі 22,7 млн тоннаға дейін артқан, оның ішінде 17,3 млн тоннасы мұнай. Қазіргі уақытта өңірде 141 мұнай танкері, 133 мұнай өнімдерін тасымалдайтын кеме және 17 сұйытылған табиғи газ тасымалдаушысы бар.
Талдаушылардың айтуынша, соңғы уақытта мұнай өнімдерін тасымалдайтын кемелердің мұнай тиеуі жиілеген.
«Сонымен қатар Парсы шығанағында мұнайды қайта тиеу көлемі қалыпты деңгейде тек БАӘ-де сақталып отыр. Ал Сауд Арабиясы, Ирак және Кувейтте бұл көрсеткіш қалыпты деңгейден екі еседен астам төмендеген», – делінген талдау материалында.
Ормуз бұғазы әлемдегі ең маңызды теңіз сауда жолдарының бірі және мұнай тасымалы үшін стратегиялық маңызға ие. Әлемдік мұнай мен газ жеткізілімдерінің шамамен бестен бірі осы бұғаз арқылы өтеді. АҚШ-тың Иранға қарсы әрекеттеріне байланысты Тегеран дұшпан елдермен байланысты танкерлер мен басқа да коммерциялық кемелердің Ормуз бұғазы арқылы өтуіне шектеу қойған.
