Астана. 1 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Air Astana компаниясының бас атқарушы директоры Ибрагим Жанлыелмен кездесу барысында рейстердің жиі кешігуі мен әуе кемелерінің ауыстырылуына қатысты халықтың орынды сынына назар аударды. Бұл туралы Ақорданың баспасөз қызметі хабарлады.
Мемлекет басшысы аталған түйткілдерді жою үшін нақты шаралар қабылдауды тапсырды. Сондай-ақ Қазақстан үшін туризм тұрғысынан маңызды елдерге әуе қатынасын кеңейту қажеттігін атап өтті.
Президент әуе компаниясы алдында тұрған стратегиялық міндеттердің қатарында әуе паркін ұлғайту, бағыттар желісін кеңейту және елдің транзиттік әлеуетін күшейту бар екенін айтты. «Атап айтқанда, АҚШ пен Жапонияға тікелей әуе қатынасын ашу басым бағыттардың бірі ретінде белгіленді», – делінген хабарламада.
Ибрагим Жанлыелдің айтуынша, Air Astana 2026–2027 жылдары жеткізілетін Boeing 787 Dreamliner ұшақтары арқылы әуе паркін толықтыруды жоспарлап отыр. Бұдан бөлек, Airbus A320neo және A321neo әуе кемелерінің 50-ге дейінгі бірлігіне, сондай-ақ 2036 жылға дейін жеткізілетін қосымша 15 Boeing 787-9 ұшағына тапсырыс берілген.
Компания алдағы уақытта бағыттар желісін кеңейтуді, мультимодальды тасымалды дамытуды, рейстер жиілігін арттыруды, сондай-ақ цифрландыру мен жаңа технологияларды енгізуге басымдық беруді жоспарлап отыр.
Air Astana – Қазақстандағы ең ірі әуе тасымалдаушысы. Оның құрамына FlyArystan лоукостері де кіреді. 2024 жылдың басында компания IPO өткізіп, соның нәтижесінде Air Astana мен оның акционерлері 370 млн АҚШ долларын тартты. Сол кезде әуе компаниясының нарықтық құны 847 млн АҚШ долларына бағаланған.
Компанияның ресми сайтындағы мәліметке сәйкес, қазіргі таңда «Самұрық-Қазына» ұлттық әл-ауқат қоры Air Astana акцияларының 41 пайызына, Бірыңғай жинақтаушы зейнетақы қоры 6,5 пайызына иелік етеді. Қалған 51,78 пайызы өзге акционерлерге тиесілі.
Air Astana мен FlyArystan әуе паркі Boeing және Airbus ұшақтарынан құралған.
