Астана. 21 қазан. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев Қостанай қаласында орналасқан KIA Qazaqstan автомобиль зауытының ашылу рәсіміне телекөпір арқылы қатысып, жаңа өндіріс орнының жұмысына ресми түрде бастау берді, деп хабарлайды Ақорда баспасөз қызметі.
Президент өз сөзінде екі жыл бұрын Қостанайға жасаған сапары барысында KIA Sportage маркалы көліктердің құрастыру желісі іске қосылғанын, ал бүгін KIA Motors компаниясымен жасалған келісім аясында толыққанды өндірістік кешеннің жұмысын бастағанын еске салды.
«KIA Qazaqstan зауытының іске қосылуы еліміздің автоөнеркәсібінің технологиялық жаңғыруына тың серпін береді. Болашақта бұл кәсіпорын басқа да жаңа үлгідегі көліктерді шығара бастайды деп сенемін. Сол арқылы біз жаһандық нарыққа жоғары сапалы, халықаралық стандарттарға сай өнім ұсыну мүмкіндігіне ие боламыз. Қазақстан жаһандық автопромның дамуына өз үлесін қосуға дайын», – деді Мемлекет басшысы.
Президент өндірісте локализацияға басымдық берілгенін, бұл шығарылатын өнімдегі қазақстандық қамтудың үлесін арттыруға мүмкіндік беретінін айтты.
«Сарапшылардың есебінше, автозауыттағы әрбір жұмыс орны логистика, сервис және инфрақұрылым салаларында қосымша бес-алты жұмыс орнын тікелей болмаса да, жанама түрде қалыптастырады. Бұл жай ғана өндіріс көлемін арттыру емес, толыққанды индустриялық кластер қалыптастыру жолындағы маңызды қадам. Мұнда шағын және орта бизнес үшін де даму алаңы ашылады», – деді Қасым-Жомарт Тоқаев.
Президенттің мәліметінше, 2023 жылы елдің автоөнеркәсібіне 290 миллиард теңгеден астам инвестиция тартылған, бұл алдыңғы жылмен салыстырғанда 2,5 есе көп. Оң динамика биыл да сақталып отыр – жылдың басынан бері салаға 178 миллиард теңге инвестиция салынған.
2023 жылы Қазақстанда 145 мыңнан астам автомобиль өндірілді. Елдегі автозауыттар Астана, Алматы, Семей, Орал, Көкшетау, Қостанай және Саран қалаларында орналасқан. Салада 10 мыңнан астам адам еңбек етеді, олардың жартысына жуығы – жастар.
KIA Qazaqstan зауытының құрылысы туралы шешім 2023 жылы қабылданған. Кәсіпорын Қостанайдың индустриялық аймағында орналасқан, жалпы аумағы – 62,95 гектар. Зауыттың өндірістік қуаты – жылына 70 мың көлік. Жобаға құйылған инвестиция көлемі – 131,5 миллиард теңге. Мұнда 1500 тұрақты жұмыс орны құрылған. Шығарылатын өнім Қазақстанда, сондай-ақ Орталық Азия мен ЕАЭО елдерінде саудаланады.
