Астана. 18 наурыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев «Қазақстан Республикасы Үкіметі мен Австрия Республикасы Федералдық үкіметі арасындағы заңсыз жүрген адамдарды реадмиссиялау және транзиттеу туралы келісімді ратификациялау туралы» заңға қол қойды. Бұл туралы сәрсенбі күні президенттің баспасөз қызметі хабарлады.
Заңның мақсаты – заңсыз көші-қонға қарсы іс-қимыл саласында Қазақстан мен Австрия арасындағы ынтымақтастықтың құқықтық негізін қалыптастыру, сондай-ақ екі ел аумағында болу немесе кіру талаптарына сәйкес келмейтін адамдарды анықтау және оларды қауіпсіз әрі реттелген түрде қайтарудың тиімді тетіктерін енгізу.
Атап айтқанда, келісімде негізгі ұғымдарға анықтамалар берілген. Олардың қатарында «азамат», «үшінші елдің азаматы», «азаматтығы жоқ адам», «заңсыз жүрген адам», сондай-ақ «сұрау салушы» және «сұрау салынатын тарап» ұғымдары нақтыланған.
Сонымен қатар тараптардың өз азаматтарын реадмиссиялау жөніндегі міндеттемелері, сондай-ақ үшінші ел азаматтары мен азаматтығы жоқ адамдарды реадмиссиялау шарттары мен негіздері айқындалған.
Құжатта тұлғаларды сәйкестендіру рәсімдері де реттелген, оның ішінде азаматтығын құжаттық растау, сұхбат жүргізу және әртүрлі деңгейдегі дәлелдемелерді пайдалану көзделген.
Келісім дербес деректердің қауіпсіздігін қамтамасыз етуге қатысты қатаң кепілдіктерді қамтиды, оның ішінде заңсыз өңдеуден, сондай-ақ кездейсоқ жоғалту, жою немесе бүлдіруден қорғау шаралары қарастырылған.
Сондай-ақ реадмиссияға байланысты қаржылық міндеттемелер, оның ішінде тасымалдау және транзит шығындарын бөлу тәртібі белгіленген.
Келісімді іске асыруға уәкілетті органдар ретінде Қазақстанның Ішкі істер министрлігі және Австрия Федералдық ішкі істер министрлігінің Иммиграция және баспана істері жөніндегі федералдық ведомствосы айқындалған.
Келісімді ратификациялау заңсыз көші-қонмен және трансшекаралық ұйымдасқан қылмыспен күресте екіжақты ынтымақтастықты нығайтуға, сондай-ақ халықаралық құқықтың жалпыға танылған қағидаттары мен нормаларына сәйкес қауіпсіз реадмиссияны қамтамасыз етуге мүмкіндік береді.
