Астана. 24 желтоқсан. ИНТЕРФАКС-ҚАЗАҚСТАН – Қазақстан Парламенті Мәжіліссәрсенбі күні өткен жалпы отырыста креативті индустрияларды қолдау және дамыту мәселелері бойынша кейбір заңнамалық актілерге өзгерістер мен толықтырулар енгізу туралы заңды екінші оқылымда қабылдады.
Қабылданған құжат креативті қызметті жүзеге асыру тәртібін одан әрі құқықтық тұрғыдан реттеуге бағытталған. Атап айтқанда, заңда «креативті индустрия қызметкері», «креативті индустрия субъектілерінің тізілімі» сияқты жаңа ұғымдарды енгізу көзделгені заңға берілген қорытындыда көрсетілген.
Сонымен қатар, Мәдениет және ақпарат министрлігінің креативті индустриялар саласындағы жобаларға жеке инвестициялар тарту барысын мониторингтеу және бағалау жөніндегі құзыреті айқындалды. Ал жергілікті атқарушы органдарға креативті индустриялардағы кәсіпкерлікті дамыту арқылы азаматтардың өзін-өзі жүзеге асыруына, таланттарды дамытуға және тиімді еңбек етуге жағдай жасау өкілеттігі беріліп отыр.
Шығармашылық еркіндік пен кәсіби дамуды қамтамасыз ету мақсатында креативті индустрия қызметкерлерінің құқықтарын қорғауға бағытталған нормалар да қарастырылған.
Мәжіліс депутаты Ерлан Стамбековтің айтуынша, бұл заңды қабылдау креативті индустриялар саласындағы мемлекеттік саясаттың жүйелі негізін қалыптастыруға, барлық басқару деңгейлерінде қолдау шараларының үйлесімділігін қамтамасыз етуге және отандық контенттің ішкі және сыртқы нарықтағы бәсекеге қабілеттілігін арттыруға мүмкіндік береді.
Түсіндірме деректерге сәйкес, қазіргі таңда Қазақстанда креативті индустрия саласында 46 мыңнан астам субъект тіркелген, салада шамамен 145 мың адам жұмыс істейді. Креативті экономиканың елдің жалпы ішкі өніміндегі үлесі шамамен 1%-ды құрайды, ал 2017 жылдан бері бұл сала көлемі үш еседен астам өскен.
Құжат әрі қарай Сенатқа жолданды.
