Астана. 13 мамыр. ИНТЕРФАКС-ҚАЗАҚСТАН – Қазақстан Парламенті Мәжілісі сәрсенбі күнгі жалпы отырыста «Педагог мәртебесі және білім беру мәселелері бойынша кейбір заңнамалық актілерге өзгерістер мен толықтырулар енгізу туралы» заңды екінші оқылымда қарап, қабылдады.
Мәжілістің әлеуметтік-мәдени даму комитетінің қорытындысында заңның негізгі ережелері педагогтардың құқықтарын қорғауға және олардың мәртебесін арттыруға бағытталғаны айтылған.
Атап айтқанда, педагогтардың білім алушылар үшін жауапкершілігі тек оқу процесі кезінде ғана белгіленеді. Сонымен қатар мұғалімдердің есепті бір мезгілде қағаз және электронды форматта жүргізуіне жол бермеу, ата-аналардың балалардың өмірі, денсаулығы мен қауіпсіздігі үшін жауапкершілігін күшейту, сондай-ақ орта білім беру ұйымдарында ұялы құрылғыларды пайдаланудың бірыңғай ережелерін бекіту ұсынылады.
Заңда Қазақстан аумағында жетекші шетелдік жоғары оқу орындарының қызметін тиімді ұйымдастыруға және қолайлы жағдай жасауға бағытталған құқықтық реттеу нормалары да енгізілген.
Сондай-ақ мектеп оқушыларын жергілікті атқарушы органдар деңгейінде ғылыми қызметке тарту және халықаралық кәсіби шеберлік байқауларының жеңімпаздарына жоғары оқу орындарында оқу үшін білім гранттарын конкурстан тыс беру жөніндегі түзетулер қарастырылған.
Түзетулердің жеке блогы жоғары білім беру жүйесін жетілдіруге бағытталған. Осы мақсатта интеграцияланған медициналық білім беру моделіне көшу ұсынылады. Бұл модель бойынша жоғары оқу орнында 6 жыл оқу және 1 жыл толыққанды интернатурадан өту көзделген. Оқуды аяқтаған түлектер медициналық практикамен айналысу құқығына ие болады, ал интернатура клиникалық тәжірибе кезеңіне айналады.
Сонымен қатар Мәжіліс «Педагог мәртебесі мәселелері бойынша Әкімшілік құқықбұзушылық туралы кодекске өзгерістер енгізу туралы» ілеспе заңды да қабылдады. Құжатта негізгі заң нормаларымен өзара байланысты құқықбұзушылық құрамдары қарастырылған.
Заңдар Сенаттың қарауына жолданды.
