Астана. 24 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев телефон арқылы Әзербайжан Президенті Ильхам Әлиевті туған күнімен құттықтады. Бұл туралы сәрсенбі күні Қазақстан басшысының баспасөз қызметі хабарлады.
Қасым-Жомарт Тоқаев Ильхам Әлиевке бауырлас әзербайжан халқының игілігі жолындағы жауапты мемлекеттік қызметінде толағай табыстар тіледі. Сондай-ақ оның елдің мемлекеттілігі мен егемендігін нығайтудағы, орнықты экономикалық өсімді қамтамасыз етудегі және Әзербайжанның халықаралық аренадағы беделін арттырудағы айрықша рөлін атап өтті.
Баспасөз қызметінің мәліметінше, әңгіме барысында мемлекеттер басшылары Қазақстан мен Әзербайжан арасындағы қарым-қатынастардың жоғары қарқынын атап өтіп, стратегиялық әріптестік пен одақтастықты одан әрі тереңдету перспективаларын талқылады. Атап айтқанда, сауда-экономикалық және мәдени-гуманитарлық салалардағы ынтымақтастықты кеңейту мәселелеріне назар аударылды.
«Жоғары деңгейде қол жеткізілген келісімдерді сапалы іске асыруға, оның ішінде биылғы 20–21 қазанда Ильхам Әлиевтің Қазақстанға жасаған мемлекеттік сапары барысында жасалған уағдаластықтарды жүзеге асыруға ерекше мән берілді», – делінген хабарламада.
Сонымен қатар тараптар өңірлік және халықаралық күн тәртібіндегі бірқатар өзекті мәселелер бойынша пікір алмасты.
