*** Астана Найробиде елшілік ашу туралы шешім қабылдады
Астана. 20 мамыр. ИНТЕРФАКС-ҚАЗАҚСТАН — Астана қаласында Қасым-Жомарт Тоқаев пен Уильям Руто шағын құрамдағы келіссөздер барысында екіжақты ынтымақтастықтың келешегін талқылады. Бұл туралы Қазақстан Президентінің баспасөз қызметі хабарлады.
Қазақстан Президенті мемлекеттік сапармен Астанаға келген Уильям Рутоға өзімен бірге ірі бизнес делегациясын алып келгені үшін алғыс білдірді.
«Мен мұны елдеріміз арасындағы ынтымақтастықты нығайтуға деген нақты ұмтылыстың айқын дәлелі деп санаймын», – деді Қасым-Жомарт Тоқаев.
Мемлекет басшысы Кенияның Қазақстан үшін Африка құрлығындағы маңызды серіктес екенін атап өтті.
«Біз сіздердің мемлекеттеріңізді құрлықтағы экономикалық және саяси тұрғыдан ең дамыған елдердің бірі ретінде қарастырамыз және түрлі саладағы ынтымақтастыққа жаңа серпін беруге мүмкіндік туғанына шын қуаныштымыз. Алға қарай табысты ілгерілеуге барлық мүмкіндік бар екеніне сенімдімін», – деді Президент.
Сонымен қатар Қасым-Жомарт Тоқаев Найроби қаласының Африкадағы халықаралық орталық ретінде танылғанын және онда БҰҰ жүйесіне кіретін ұйымдар тұрақты түрде орналасқанын атап өтті.
«Осыған байланысты Қазақстан Найробиде өз елшілігін ашу туралы шешім қабылдады», – деді Мемлекет басшысы.
Өз кезегінде Кения Президенті Қазақстанды сауда мен инвестицияны дамытудағы маңызды логистикалық хаб ретінде қарастыратынын айтты.
«Бүгінде елдеріміз арасындағы тауар айналымының өсімі байқалады. Біз Қазақстанды Еуразия өңіріне шығатын маңызды қақпа ретінде көреміз. Бұл — біздің негізгі ауыл шаруашылығы өнімдерімізді экспорттау үшін аса қызықты әрі ауқымды нарық. Менің сапарым аясында құқықтық негізді нығайтып, екіжақты ынтымақтастықты тереңдетуге жол ашатын бірқатар құжатқа қол қойылады», – деді Уильям Руто.
