Астана. 20 мамыр. ИНТЕРФАКС — НАТО Бас хатшысы Марк Рютте Швецияда өтетін альянсқа мүше елдердің сыртқы істер министрлері кездесуінің алдында одақтастардың қорғаныс саласындағы міндеттемелерін жедел орындауы қажет екенін мәлімдеді.
Өткен жылы Гаага қаласында өткен саммитте НАТО елдері 2035 жылға қарай қорғаныс шығындарын ІЖӨ-нің 5 пайызына дейін жеткізуге уағдаласқан болатын.
«Мәселе енді көбірек жұмыс істеу қажеттігінде емес. Негізгі сұрақ — одақтастар бұл міндеттемелерді нақты мүмкіндіктерге қаншалықты жылдам айналдыра алады», – деді Рютте Брюссельде өткен баспасөз мәслихатында.
Баспасөз жиыны 21–22 мамыр күндері Хельсингборг қаласында өтетін НАТО сыртқы істер министрлерінің кездесуіне арналды. Онда 7–8 шілдеде Анкарада өтетін саммитке дайындық мәселелері талқыланады.
НАТО Бас хатшысы қорғанысқа салынатын инвестицияларды тұрақты әрі жүйелі түрде арттыруға және қабылданған міндеттемелерді орындаудың «сенімді жолын» қалыптастыруға шақырды. Оның айтуынша, НАТО елдері Атлант мұхитының екі жағында да қорғаныс өнеркәсібінің өндірістік қуатын күшейтіп, әскери дайындық деңгейін арттыруы қажет.
Рютте НАТО-ның жауынгерлік әзірлігін қамтамасыз ету мәселесін ұйым ішіндегі жауапкершілікті қайта бөлумен байланыстырды. Оның айтуынша, Еуропа мен Канада дәстүрлі қорғанысқа көбірек қаражат бөліп, жауапкершілікті де өз мойнына алып келеді. Бұл өзгерістер НАТО-ның командалық құрылымынан да көрініс табуда: Еуропа біріккен күштердің үш қолбасшылығын басқарады, ал АҚШ үш құрамдас қолбасшылыққа жетекшілік етеді.
Анкара саммитінің тағы бір негізгі тақырыбы — НАТО-ның Украинаға қолдауын жалғастыру мәселесі болмақ. Рютте бейсенбі күні альянс елдерінің сыртқы істер министрлері Украина СІМ басшысы Андрей Сибигамен кездесіп, Украинаға ұзақмерзімді, тұрақты және болжамды қолдау көрсету тетіктерін талқылайтынын айтты.
«Біздің тежеп ұстау және қорғаныс қабілетімізді күшейту, әділ әрі қуатты НАТО қалыптастыру, Украинаға қолдау көрсету және түптеп келгенде альянс аумағындағы бір миллиард адамның қауіпсіздігін қамтамасыз ету» — Рютте Швециядағы НАТО сыртқы істер министрлері кеңесінің негізгі күн тәртібін осылай түйіндеді.
