Астана. 19 наурыз. ИНТЕРФАКС-ҚАЗАҚСТАН – Қазақстан парламентінің Сенаты бейсенбі күнгі жалпы отырысында Халықаралық азаматтық авиация туралы конвенцияның 50 а) және 56-баптарына өзгерістер енгізуге қатысты хаттамаларды ратификациялау туралы заңды мақұлдады.
Бұған дейін заң Мәжілісте қабылданған болатын. Осылайша, құжат Парламент тарапынан толық мақұлданып, мемлекет басшысының қол қоюына жолданды.
Аталған хаттамалар 2016 жылғы 6 қазанда Монреаль қаласында қол қойылған. Өзгерістер Халықаралық азаматтық авиация ұйымы (ИКАО) кеңесінің және Аэронавигациялық комиссияның құрамын ұлғайтуға қатысты.
Сенаттың экономикалық саясат, инновациялық даму және кәсіпкерлік комитетінің қорытындысына сәйкес, түзетулер ИКАО кеңесі мүшелерінің санын 36-дан 40-қа дейін арттыруды көздейді. Бұл мүше мемлекеттердің неғұрлым әділ, теңгерімді әрі географиялық тұрғыдан кеңінен өкілдік етуін қамтамасыз етуге бағытталған.
Сонымен қатар Аэронавигациялық комиссия құрамын 19-дан 21 мүшеге дейін ұлғайту қарастырылған. Бұл комиссия ИКАО кеңесіне бекіту үшін стандарттар мен ұсынылатын тәжірибелерді (SARPs), сондай-ақ аэронавигациялық қызмет көрсету ережелерін (PANS) қарайды және ұсынады.
Құжатты ратификациялау Қазақстанның халықаралық авиациялық міндеттемелерге бейілдігін растауға, ИКАО басқаруына тең құқықпен қатысуға, Орталық Азия елдерінің мүдделерін ілгерілетуге және ұйымдағы жауапты әрі белсенді қатысушы ретіндегі беделін нығайтуға мүмкіндік береді.
Қазіргі уақытта бұл түзетулерді 114 мемлекет ратификациялаған.
