Астана. 25 желтоқсан. ИНТЕРФАКС-ҚАЗАҚСТАН – Қазақстан Парламенті Сенаты бейсенбі күні өткен пленарлық отырыста екі оқылымда қаралып, «Қазақстан Республикасының Қылмыстық кодексіне және Қазақстан Республикасының Қылмыстық-процестік кодексіне толықтырулар енгізу туралы» заңды мақұлдады.
Осылайша, заң Парламент тарапынан толық қабылданды және Мемлекет басшысының қол қоюына жолданады.
Мәжілістің әлеуметтік-мәдени даму және ғылым жөніндегі комитетінің қорытындысына сәйкес, заңның негізгі мақсаты – медицина қызметкерлері мен жедел медициналық жәрдем көлігінің жүргізушілерін зорлық-зомбылықтан құқықтық тұрғыда қорғауды қамтамасыз ету.
Заңға сәйкес, Қазақстан Республикасының Қылмыстық кодексі 380-3-баппен толықтырылады. Бұл бап «Медицина қызметкеріне немесе жедел медициналық жәрдем көлігінің жүргізушісіне күш қолдану немесе күш қолданамын деп қорқыту» деп аталады және медицина қызметкерінің немесе жедел жәрдем көлігінің жүргізушісінің қызметтік не кәсіби міндеттерін атқару кезінде немесе сол міндеттерді орындауына байланысты, сондай-ақ аталған әрекеттер үшін кек алу мақсатында жасалған күш қолдану немесе күш қолдану қатері үшін қылмыстық жауапкершілік көздейді.
Осыған байланысты мынадай жазалау шаралары белгіленеді: медицина қызметкерлеріне және жедел жәрдем бригадасы жүргізушілеріне күш қолданамын деп қорқытқаны үшін 200-ден 500 айлық есептік көрсеткішке дейін айыппұл салу, сол мөлшерде түзеу жұмыстары, 300 сағатқа дейін қоғамдық жұмыстар, не болмаса екі жылға дейін бас бостандығын шектеу немесе бас бостандығынан айыру жазасы қарастырылады.
Ауырлататын мән-жайлар болған жағдайда жаза екі жылдан үш жылға дейін бас бостандығын шектеу немесе бас бостандығынан айыру түрінде белгіленеді. Ал өмірге немесе денсаулыққа қауіпті емес күш қолданылған жағдайда 500-ден 1000 айлық есептік көрсеткішке дейін айыппұл, сол мөлшерде түзеу жұмыстары, 600 сағатқа дейін қоғамдық жұмыстар, не болмаса екі жылдан үш жылға дейін бас бостандығын шектеу немесе бас бостандығынан айыру көзделген.
Егер бұл әрекеттер ауырлататын мән-жайларда жасалса, жаза үш жылдан жеті жылға дейін бас бостандығын шектеу немесе бас бостандығынан айыру түрінде күшейтіледі. Ал өмірге немесе денсаулыққа қауіпті күш қолданылған жағдайда бес жылдан он жылға дейін бас бостандығынан айыру жазасы тағайындалады. Ауырлататын мән-жайлар болған кезде жаза жеті жылдан он екі жылға дейін ұлғаяды.
Сонымен қатар Қазақстан Республикасының Қылмыстық-процестік кодексінің 187-бабының 2-бөлігі мен 191-бабының 2-бөлігі жаңа нормалармен толықтырылып, 380-3-бапта көзделген қылмыстық құқық бұзушылықтар бойынша сотқа дейінгі тергеп-тексеру мен анықтау жүргізу ішкі істер органдарының құзыретіне жатқызылды.
Айлық есептік көрсеткіш (АЕК) қазіргі уақытта 3932 теңгені құрайды.
