Астана. 15 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев 1993 жылғы 22 қаңтардағы азаматтық, отбасылық және қылмыстық істер бойынша құқықтық көмек туралы конвенцияға өзгерістер енгізу жөніндегі хаттаманы ратификациялау туралы заңға қол қойды.
Құжат Минск конвенциясына қатысушы мемлекеттер аумағында кәмелетке толмаған балалардың құқықтары мен мүдделерін қорғауды күшейтеді. Атап айтқанда, алимент өндіру туралы сот бұйрықтарын өзара танылатын және мәжбүрлеп орындалатын сот актілерінің тізіміне енгізу көзделген.
2020–2025 жылдар аралығында Қазақстанда халықаралық және шетелдік соттар мен арбитраждардың шешімдері негізінде балалардың пайдасына 106 атқарушылық құжат берілген. Осы істер бойынша берешек көлемі шамамен 47 млн теңгені құраған.
Сенаттың салалық комитеті қорытындысында атап өткендей, хаттаманы ратификациялау трансшекаралық жағдайларда алимент өндірудің тиімділігін арттырып, балалардың құқықтарын қорғауды күшейтеді, сондай-ақ Қазақстанның осы бағыттағы халықаралық беделін нығайтады.
Сонымен қатар Мемлекет басшысы 2002 жылғы 7 қазандағы азаматтық, отбасылық және қылмыстық істер бойынша құқықтық көмек туралы конвенцияға өзгерістер енгізу жөніндегі хаттаманы ратификациялау туралы заңға да қол қойды.
Бұл хаттама да кәмелетке толмағандардың құқықтары мен заңды мүдделерін қорғауға бағытталған. Түзетулерге сәйкес, алимент өндіру туралы сот бұйрықтары Кишинев конвенциясына қатысушы мемлекеттер аумағында танылып, орындалатын болады.
1993 жылғы Минск конвенциясы – ТМД елдері арасындағы азаматтық, отбасылық және қылмыстық істер бойынша құқықтық көмек көрсету тәртібін реттейтін негізгі халықаралық келісім. Ал Кишинев конвенциясы осы қағидаттарды дамыта отырып, қатысушы мемлекеттер аумағында сот шешімдерін өзара тану мен азаматтардың құқықтарын қорғауды қамтамасыз етеді.
