Астана. 8 мамыр. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Алатау қаласының ерекше құқықтық режимі туралы» конституциялық заңға қол қойды. Бұл туралы Мемлекет басшысының баспасөз қызметі хабарлады.
Заңның негізгі мақсаты — Алатау қаласының қарқынды әрі тұрақты дамуына жағдай жасау. Құжатқа сәйкес, Алатау жобасы дербес экожүйе ретінде қарастырылады. Ол жеке қаржылық модельге, арнайы басқару режиміне және жаңа институционалдық негізге сүйенеді.
Заң аясында «Alatau City Authority» атты жаңа орган құрылады. Оның қызметін Премьер-министр төрағалық ететін кеңес айқындайды.
Сондай-ақ заң инвестициялық келісімдердің тұрақтылығын, ерекше құқықтық режимнің басымдығын және лицензиялаудың айрықша тәртібін бекітеді. Мұнымен қоса, «бір терезе» қағидаты бойынша тәуелсіз реттеу жүйесі енгізіледі.
Инвесторлардың құқығы халықаралық деңгейде қорғалады. Олар «Астана» халықаралық қаржы орталығына немесе халықаралық арбитражға жүгіну мүмкіндігін өздері таңдай алады.
Заңда салықтық жеңілдіктер тек қала дамуының басым бағыттарына сай келетін жаңа инвестициялық жобаларға ғана берілетіні қарастырылған. Инвесторларға берілетін барлық жеңілдіктер мен олардың міндеттемелері ашық жарияланады.
«Alatau City Authority» республикалық бюджеттік бағдарламалардың дербес әкімшісі болады. Оның бюджеті республикалық бюджет құрамында блоктық бюджеттеу қағидатымен қалыптасады және негізінен инфрақұрылымды дамыту мен ұзақ мерзімді жобаларды қолдауға жұмсалады. Ал қаланың жергілікті бюджеті ағымдағы және әлеуметтік міндеттемелерді орындауға бағытталады. Алатау өзін-өзі қаржыландыру деңгейіне жеткенге дейін қала бюджетінен өзге бюджеттерге қаржы алуға жол берілмейді.
Бұған қоса, заң Алатаудың «Smart City» үлгісінде дамуын реттейді. Тұрғындарға цифрлық платформа арқылы негізгі қызметтер, соның ішінде рұқсат беру рәсімдері көрсетіліп, ерекше құқықтық режим қолданылады. Сондай-ақ цифрлық активтер айналымын, соның ішінде криптобиржалар мен токенизацияны реттеу мүмкіндігі қарастырылған.
Алматы облысындағы Алатау қаласы 2024 жылғы қаңтарда Мемлекет басшысының жарлығымен құрылды. Қаланың бас жоспары Сингапурдың «Surbana Jurong» компаниясымен бірлесіп әзірленді. 2025 жылғы қыркүйекте Президент Алатауға ерекше мәртебе беру туралы жарлыққа қол қойды. Жоспар бойынша, «Алатау Сити» өңірдегі алғашқы толықтай цифрланған қала болады: мұнда «ақылды қала» технологияларынан бастап, тауарлар мен қызметтер үшін криптовалютамен есеп айырысу мүмкіндігіне дейін енгізіледі.
