Астана. 12 маусым. ИНТЕРФАКС-ҚАЗАҚСТАН – Қасым-Жомарт Тоқаев сыбайлас жемқорлыққа қарсы іс-қимыл мәселелері бойынша бірқатар заңнамалық актілерге өзгерістер мен толықтырулар енгізу туралы заңға қол қойды. Бұл туралы жұма күні Мемлекет басшысының баспасөз қызметі хабарлады.
Заң сыбайлас жемқорлықтың алдын алуға бағытталған шараларды күшейтуді көздейді. Атап айтқанда, мемлекеттік қызметшілер мен оларға теңестірілген тұлғаларға қызметтік өкілеттіктерін жеке мүдделері үшін пайдалануға тыйым салынады.
Сонымен қатар мемлекеттік функцияларды орындауға уәкілетті адамдарға теңестірілген тұлғалардың тізбесі кеңейтіледі, жақын туыстардың бір мекемеде қызмет атқаруына қатысты шектеулер күшейтіледі және ішкі сыбайлас жемқорлыққа қарсы бақылау тетіктері жетілдіріледі.
Атап айтқанда, бір мемлекеттік органда басшының жиендері, қайын інілері, бажа-құдалары, қайнылары және күйеу балаларының қызмет атқаруына тыйым салынады.
Заңға сәйкес, енді тек пара алу мен пара беру ғана емес, сондай-ақ пара беруге уәде ету, пара ұсыну немесе пара талап ету әрекеттері үшін де қылмыстық жауапкершілік қарастырылған.
Бұдан бөлек, жеке тұлғалар үшін әкімшілік сыбайлас жемқорлық құқық бұзушылықтары бойынша талап қою мерзімі бір жылдан үш жылға дейін ұлғайтылды.
