Астана. 10 желтоқсан. ИНТЕРФАКС-ҚАЗАҚСТАН – Қазақстан Республикасы Парламенті Мәжілісі сәрсенбі күнгі пленарлық отырыста «Күзет қызметі мәселелері бойынша кейбір заңнамалық актілерге өзгерістер мен толықтырулар енгізу туралы» заң жобасын екінші оқылымда қабылдады.
Мәжіліс депутаты Магеррам Магеррамовтың айтуынша, құжат мемлекеттік бақылауды жетілдіру, сондай-ақ қару иелеріне және күзет қызметімен айналысатын ұйымдарға қойылатын талаптарды күшейту мақсатында әзірленген.
Заң жобасы күзет қызметі субъектілерінің құқықтарын және қару айналымы саласындағы заңнамалық талаптарды нақтылайды, мемлекеттік пулегильзотека қалыптастыру тәртібін айқындайды және азаматтық әрі қызметтік нарезді атыс қаруына уақтылы бақылау атқылауын (контрольный отстрел) жүргізу міндетін енгізеді.
Құжатқа сәйкес, қызметі тоқтатылған жағдайда қаруға ие заңды тұлғалар 10 жұмыс күні ішінде қару мен оның оқ-дәрілерін ішкі істер органдарына өткізуге міндетті болады.
Күзет қызметімен айналысатын субъектілер ведомствоға өз қызметі туралы есептілікті ұсынуға тиіс, ал есептіліктің нысаны мен мерзімділігі уәкілетті орган тарапынан бекітіледі.
Қару иелері азаматтық және қызметтік нарезді атыс қаруын бақылау атқылауына ұсынуға міндеттеледі.
Сонымен қатар, заң жобасы «әскери күзетпен қамтамасыз етілген теміржол күзеті» ұғымын енгізеді. Бұл – акцияларының бақылау пакеті ұлттық басқарушы холдингке немесе ұлттық теміржол компаниясына тиесілі заңды тұлға. Әскери теміржол күзетінің негізгі мақсаты транзиттік жүк тасымалдарына қатысатын терминал аумақтарында жүктер мен теміржол көлігі нысандарын тәулік бойы қорғауды қамтамасыз ету болады.
Қабылданған заң Сенаттың қарауына жіберілді.
