Астана. 10 желтоқсан. ИНТЕРФАКС-ҚАЗАҚСТАН – Қазақстан Республикасы Парламенті Мәжілісі сәрсенбі күнгі пленарлық отырыста екі оқылымда бірден қарап, «Қазақстан Республикасының Бюджетке төленетін салықтар мен өзге де міндетті төлемдер туралы» кодексіне (Салық кодексі) коммуналдық меншікке тиесілі энергия өндіруші ұйымдарға салық салу мәселелері бойынша толықтырулар енгізу туралы» заңды қабылдады.
Мәжілістің қаржы және бюджет комитетінің қорытындысында көрсетілгендей, құжат депутаттар бастамасымен әзірленген. Оның мақсаты – коммуналдық меншікке тиесілі, электр энергиясын, су (дистиллят) және жылу энергиясын өндіру қызметін қатар жүзеге асыратын энергия өндіруші ұйымдарға бөлінетін мемлекеттік субсидияларды толық игеруге жағдай жасау.
Түзетуге сәйкес, салық салу мақсатында табыс ретінде танылмайтын қаражаттар тізбесіне үкімет резервінен және жергілікті атқарушы органдардан бөлінетін субсидиялар, сондай-ақ 100% акциясы мемлекетке тиесілі, коммуналдық меншікке жататын және электр энергиясын, су (дистиллят) және жылу энергиясын өндірумен қатар айналысатын энергия өндіруші ұйымдарға берілетін гранттар немесе өзге де өтеусіз көмек енгізіледі.
Бұған қоса, түзету шеңберінде үкімет резервінен және жергілікті атқарушы органдардан бөлінетін субсидиялар, гранттар немесе өзге де өтеусіз көмек есебінен жүзеге асырылған шығыстар шегерімге жатқызылмайтыны белгіленді. Бұл норма 100% акциясы мемлекетке тиесілі, коммуналдық меншікке қарасты энергия өндіруші ұйымдарға қолданылады.
Қабылданған заң Сенаттың қарауына жіберілді.
