Астана. 10 желтоқсан. ИНТЕРФАКС-ҚАЗАҚСТАН – Қазақстан Республикасы Парламенті Мәжілісі сәрсенбі күні өткен пленарлық отырысында «Қазақстан Республикасы Үкіметі мен Моңғолия Үкіметі арасындағы зейнетақы саласындағы ынтымақтастық туралы келісімді ратификациялау туралы» заңды қабылдады.
Еңбек және халықты әлеуметтік қорғау вице-министрі Виктория Шегайдың айтуынша, аталған келісім 2024 жылғы қазанда Ұлан-Батор қаласында қол қойылған.
«Келісімді ратификациялау екі ел азаматтарының зейнетақымен қамсыздандыру саласындағы құқықтарын қамтамасыз етуге бағытталған. Атап айтқанда, ол азаматтардың бір елдің аумағына қоныс аударуы немесе уақытша тұруы жағдайында зейнетақы төлемдерін тағайындау кезінде еңбек өтілін өзара есепке алу мүмкіндіктерін кеңейтеді», – деді вице-министр.
Оның атап өтуінше, келісімде зейнетақының жинақтаушы бөлігін экспорттау бойынша ынтымақтастықтың жаңа тетіктері көзделген, сондай-ақ Қазақстан мен Моңғолия аумағында жинақталған, зейнетақы төлемдерін тағайындау үшін қажетті еңбек өтілін растау тәртібі айқындалған.
Қабылданған заң Сенаттың қарауына жолданды.
