Астана. 3 шілде. ИНТЕРФАКС-ҚАЗАҚСТАН – Мемлекет басшысы Қасым-Жомарт Тоқаев «Қазақстан Республикасындағы кедендік реттеу туралы» кодекске өзгерістер мен толықтырулар енгізу туралы заңға қол қойды. Заңның мәтіні жұма күні ресми бұқаралық ақпарат құралдарында жарияланды.
Бұған дейін Ұлттық экономика бірінші вице-министрі Азамат Әмрин заң жобасында бірқатар өзгеріс көзделгенін хабарлаған болатын. Атап айтқанда, үшінші елдердегі шетелдік интернет-платформалардан жеке тұлғаларға халықаралық пошта жөнелтілімдері арқылы жеткізілетін тауарлар жеке санатқа бөлініп, «электрондық сауда тауарлары» ұғымы енгізіледі.
Сонымен қатар заңда «электрондық сауда операторы» ұғымы бекітіліп, кедендік декларацияның жаңа түрі – электрондық сауда декларациясы енгізіледі.
Қазіргі қолданыстағы тәртіп бойынша шетелдік интернет-дүкендерден сатып алынатын тауарлар жеке пайдалануға арналған тауарлар санатына жатады және олар кедендік бажсыз әкелу нормасы асқан жағдайда ғана декларацияланады.
Бұл ретте электрондық сауда тауарлары тек жеке тұлғалардың жеке пайдалануына арналған және кәсіпкерлік қызметте пайдалануға арналмаған.
Сондай-ақ мұндай тауарлар сауда айналымының құрамына кірмейтіндіктен, ресми статистикада есепке алынбайды.
Азамат Әмриннің айтуынша, электрондық сауда арқылы сатып алынатын барлық тауарды декларациялау шетелдік интернет-платформалардан сатып алынатын өнімдер жөнінде толық статистикалық деректерді қалыптастыруға мүмкіндік береді.
Оның айтуынша, заңның негізгі мақсаты – электрондық сауда операторы арқылы тауарларды декларациялау рәсімдерін жеңілдету, электрондық сауда импорты бойынша толық әрі нақты статистиканы қалыптастыру, трансшекаралық электрондық сауда саласын жүйелеу және нарықтың ашықтығын арттыру.
