Астана. 14 сәуір. ИНТЕРФАКС-ҚАЗАҚСТАН – Қаржыландыруға байланысты шектеулерге байланысты Қазақстан биыл тұрғын үйді пайдалануға беру бойынша жоспарланған көрсеткішке жете алмауы мүмкін. Көрсеткіш 8%-ға төмендеп, жоспарланған 20,2 млн шаршы метрдің орнына 18,5 млн шаршы метрді құрауы ықтимал. Бұл туралы Өнеркәсіп және құрылыс министрі Ерсайын Нагаспаев мәлімдеді.
Министрдің мәліметінше, 2026 жылдың I тоқсанында республикада тұрғын үйді пайдалануға беру көлемі 3,8%-ға өсіп, 3,9 млн шаршы метрді құраған. Өсім 18 өңірде тіркелген, оның ішінде ең жоғары көрсеткіш Абай облысында (41,3%), Қарағанды облысында (26%) және Шымкент қаласында (14,7%) байқалған. Ал Атырау және Ақмола облыстарында керісінше төмендеу орын алған.
«Оң динамиканы сақтау үшін биылғы жоспар 20,2 млн шаршы метр деңгейінде белгіленді», – деді министр Үкімет отырысында.
Оның айтуынша, жоспарға қол жеткізу үшін тұрғын үй құрылысын ынталандыруға бағытталған қосымша шаралар қарастырылған. Атап айтқанда, 332 млрд теңгеге 20 мың жалдамалы пәтер сатып алу және 184 млрд теңгеге жетіспейтін инженерлік инфрақұрылымды жүргізу жоспарланып отыр.
«Алайда өңірлердің тұрғын үй құрылысына алынған қарыздарын өтеу мәселелері толық шешімін таппаған. Қазіргі қаржыландыру жағдайында тұрғын үйді пайдалануға беру көлемі 18,5 млн шаршы метр деңгейінде болжанып отыр», – деді ведомство басшысы.
Осыған байланысты тұрғын үй құрылысын қаржыландыруды оңтайландыру шаралары қарастырылуда. Атап айтқанда, жергілікті бюджеттердің облигациялар бойынша қарыздары мен пайыздық төлемдерін өтеуге жұмсалатын шығындарды жабу тетіктері талқылануда немесе бұл шығындарды республикалық бюджет есебінен өтеу мүмкіндігі қарастырылуда.
