Астана. 14 сәуір. ИНТЕРФАКС-ҚАЗАҚСТАН – 2025 жылдың қорытындысы бойынша Қазақстан мен Беларусь арасындағы тауар айналымы 30%-ға өсіп, 1,2 млрд долларға жетті. Бұл туралы Қазақстан Президентінің баспасөз қызметі хабарлады.
Мемлекет басшысы Қасым-Жомарт Тоқаев Беларусьтің Сыртқы істер министрі Максим Рыженковты қабылдады. Кездесу барысында тараптар өнеркәсіптік кооперация, көлік, ауыл шаруашылығы, туризм және өзге де салалардағы ынтымақтастықты одан әрі дамыту мәселелерін талқылады.
«Қазақстандық өнім экспортын арттыру мәселесіне ерекше назар аударылды. 2025 жылдың қорытындысы бойынша екі ел арасындағы тауар айналымы 30%-ға өсіп, 1,2 млрд долларды құрады», – делінген хабарламада.
Президент Алматы қаласында Беларусьтің Бас консулдығын ашу жоспарланып отырғанын құптап, бұл қадам екі ел өңірлері арасындағы байланысты нығайтуға ықпал ететінін атап өтті.
