Астана. 23 ақпан. ИНТЕРФАКС-ҚАЗАҚСТАН — Қазақстанда жаңа Конституцияны қабылдау жөніндегі референдумда дауыс беру үшін 12 586 413 бюллетень дайындалады. Бұл туралы Орталық сайлау комиссиясының мүшесі Михаил Бортник мәлімдеді.
«Дауыс беруге арналған бюллетень мәтіні қазақ және орыс тілдерінде басылады. Дауысқа қойылатын сұрақтың тұжырымы: “2026 жылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясының жобасын қабылдайсыз ба?”», — деді Бортник дүйсенбі күні Референдумның орталық комиссиясы отырысында.
Бюллетеньде екі жауап нұсқасы болады: «Иә, қабылдаймын» және «Жоқ, қабылдамаймын».
Дауыс берушілер тізіміне енгізілген азаматтардың саны 12 461 796 адамды құрайды.
«“Республикалық референдум туралы” конституциялық заңға сәйкес, дауыс беру бюллетеньдері әр учаскеге сол жердегі сайлаушылар санына қосымша бір пайыздық резервпен жеткізіледі. Сондықтан дайындалатын бюллетеньдердің жалпы саны 12 586 413 дананы құрайды», — деп атап өтті Бортник.
Заңнамаға сәйкес, бюллетеньдер учаскелік комиссияларға дауыс беру күніне дейін үш күннен ерте емес және бір күннен кешіктірілмей жеткізіледі.
Қазақстанда жаңа Конституцияны қабылдау жөніндегі республикалық референдум 15 наурызға белгіленген.
Ел халқының саны шамамен 20,5 млн адамды құрайды.
