АСТАНА. 3 қыркүйек. ИНТЕРФАКС-ҚАЗАҚСТАН — Қазақстан – Қытай магистральдық мұнай құбырының жекелеген учаскелерін кеңейту құны $327 млн деп бағаланып отыр. Жобаны іске асыру үшін қарыз қаражатын тарту жоспарланған. Бұл туралы «ҚазТрансОйл» АҚ (ҚТО) материалдарында айтылған.
«ҚазТрансОйл» жүзеге асыратын жобалар аясында Кеңқияқ – Атырау мұнай құбырының өткізу қуатын жылына 15 млн тоннаға, Кеңқияқ – Құмкөл құбырын 20 млн тоннаға дейін арттыру көзделген.
«Алдын ала құны — 327 млн АҚШ доллары (176,7 млрд теңге). Қаржыландыру көзі — қарыз қаражаты», — делінген Қазақстан қор биржасының (KASE) алаңында өткен Эмитент күні барысында таныстырылған ҚТО презентациясында.
Жобаны іске асыру мерзімі — 2026-2030 жылдар. Оған «ҚазТрансОйл» АҚ, «Солтүстік-Батыс құбыр компаниясы «МұнайТас» ЖШС (ҚТО — 51%, қытайлық CNPC — 49%) және «Қазақстан-Қытай Құбыры» ЖШС (ҚТО — 50%, қытайлық CNODC — 50%) қатысады.
Жоба аясында бес мұнай айдау станциясын салу жоспарланған.
Кеңқияқ – Атырау және Кеңқияқ – Құмкөл учаскелері Қазақстан – Қытай магистральдық мұнай құбырлары жүйесіне кіреді.
Бұған дейін «ҚазМұнайГаз» ұлттық компаниясы қытайлық CNPC компаниясымен бірлесіп аталған учаскелерді кеңейтудің техникалық-экономикалық негіздемесін әзірлеуге кіріскенін хабарлаған.
Кеңқияқ – Құмкөл магистральдық мұнай құбыры Қазақстан мен Қытай үкіметтері арасында 2004 жылғы 17 мамырда жасалған мұнай-газ саласындағы жан-жақты ынтымақтастықты дамыту туралы негіздемелік келісімге сәйкес салынған. Құбыр 2009 жылы пайдалануға берілді. Ұзындығы — 794,2 км, жобалық қуаты — жылына 10 млн тонна мұнай.
Кеңқияқ – Атырау магистральдық мұнай құбыры 2003 жылы пайдалануға берілген. Ол Ақтөбе және Атырау облыстарының аумағы арқылы өтіп, мұнайды екі бағытта тасымалдауға мүмкіндік береді. Құбыр арқылы мұнай Өзен – Атырау – Самара және Каспий құбыр консорциумы бағыттарына жөнелтіледі. Сондай-ақ Батыс Қазақстан мұнайын Шымкент пен Павлодардағы отандық мұнай өңдеу зауыттарына және экспортқа тасымалдау қамтамасыз етіледі. Құбырдың жобалық қуаты — жылына 6 млн тонна.
