Бейжің. 24 шілде. ИНТЕРФАКС – Қытай билігі АҚШ-тың екінші тараппен алдын ала кеңеспей енгізетін кез келген біржақты кедендік баждарын қабылдамайтынын тағы да мәлімдеді. Бұл туралы жұма күні Қытай Сыртқы істер министрлігінің ресми өкілі Линь Цзянь журналистерге айтты.
Global Times басылымының хабарлауынша, Линь Цзянь Қытай мен АҚШ арасындағы сауда-экономикалық қатынастарға қатысты Бейжіңнің ұстанымы өзгермейтінін атап өтті.
«Қытай кез келген нысандағы біржақты тарифтік шараларға қарсы. Тарифтік және сауда соғыстары ешбір тарапқа пайда әкелмейді», – деді Қытай СІМ өкілі.
Бұған дейін жұма күні АҚШ-тың Сауда өкілдігі кеңсесінің басшысы Джеймисон Грир АҚШ 60 елге қатысты жаңа импорттық баждар енгізетінін мәлімдеген болатын. Оның айтуынша, бұл шаралар мәжбүрлі еңбекке қарсы күрес мақсатында қабылданған.
Хабарламаға сәйкес, белгілі бір ерекшеліктерді ескере отырып, АҚШ-тың 60 сауда серіктесіне қатысты 10% және 12,5% мөлшерінде импорттық баждар белгіленеді.
Құжатқа сәйкес, Ресейден импортталатын өнімдерге 12,5% көлемінде кедендік баж салығы енгізіледі.
Жаңа мөлшерлемелер АҚШ президенті Дональд Трамп бұрын уақытша енгізген 10 пайыздық жаһандық импорттық баждың орнына қолданылады. 150 күнге белгіленген бұл шаралардың мерзімі жұма күні аяқталады. Дональд Трамп оларды биыл ақпан айында, АҚШ Жоғарғы соты өткен жылы қабылданған баждарды күшін жойғаннан кейін енгізген болатын.
