Токио. 21 қазан. ИНТЕРФАКС – Жапонияның бұрынғы ішкі істер министрі және қазіргі билеуші Либералды-демократиялық партияның (ЛДП) көшбасшысы Санаэ Такаити ел тарихында премьер-министр қызметіне тағайындалған алғашқы әйел атанды. Бұл туралы сейсенбі күні Kyodo агенттігі хабарлады.
Төменгі палатадағы (465 орыннан тұратын өкілдер палатасы) дауыс беру барысында Такаитидің кандидатурасын 237 депутат қолдады, ал көпшілік дауысты алу үшін 233 дауыс жеткілікті еді. Жапонияның заңнамасына сәйкес, премьерді сайлау кезінде төменгі палата жоғарғы палатаға (кеңесшілер палатасы) қарағанда айтарлықтай басымдыққа ие.
Кейінірек, осы күні Жапония императоры Нарухито Санаэ Такаитидің премьер-министр ретінде сайлануын ресми түрде бекітеді.
Бұған дейін Жапония үкіметі премьер-министр Сигэру Исибаның басшылығымен отставкаға кеткен болатын. Бұл – парламенттің жаңа премьер кандидатурасына дауыс беруіне жол ашты.
NHK телеарнасының хабарлауынша, Такаити ЛДП басшысын сайлау барысында басты қарсыласы болған Синдзиро Коидзумиді қорғаныс министрі етіп тағайындамақ. Тағы бір қарсыласы Есимаса Хаяси ішкі істер министрлігін басқарады. Ал бұрынғы кабинет бас хатшысы Тосимицу Мотэги сыртқы істер министрі қызметіне ауысады. Қаржы министрлігін Сацуки Катаяма басқарады.
Такаитидің премьерлікке сайлануына жол ашқан маңызды фактор – ЛДП мен оппозициялық «Жапония инновациялар партиясының» коалициялық келісімі болды. Алайда бұл шешім ЛДП мен оған 20 жылдан астам уақыт бойы одақтас болып келген «Комэйто» партиясының альянсты үзуімен қатар жүрді.
64 жастағы Санаэ Такаити Kyodo мәліметінше, ұлттық қауіпсіздік мәселесінде қатаң ұстанымымен танымал. Бұрынғы ішкі істер министрі ретінде ол 1947 жылғы Жапония конституциясының милитаризмнен бас тартуды көздейтін 9-бабын қайта қарауды қолдайды.
Такаити әсіре оңшыл және ұлтшыл көзқарастарымен белгілі. Ол Жапониядағы ең ірі консервативтік әрі ұлтшыл үкіметтік емес ұйым – «Ниппон Кайги» мүшесі, сондай-ақ синтоизм құндылықтарын жаңғырту мен адамгершілік тәрбиені насихаттайтын парламенттік конференция төрағасының орынбасары. Такаити бірнеше рет жапон милитаризмінің символына айналған Ясукуни ғибадатханасына барды. Бұл сапарлар Қытай, Оңтүстік Корея және Солтүстік Корея тарапынан әрдайым өткір сынға ұшырап, оккупациялық саясаттың жарасын тырнау ретінде қабылданады.
Сонымен қатар, Такаити Қытайдың экономикалық саясатына сын көзбен қарап, Жапонияның ҚХР-ға деген экономикалық тәуелділігін азайту қажеттігін жиі алға тартады.
