АСТАНА. 5 қаңтар. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев елдегі Қарулы күштерде болған қайғылы оқиғаларға қатысты пікір білдіріп, мұндай жағдайлар жекелеген бөлімдерде орын алғанын, бүкіл армияға тән емес екенін атап өтті.
«Мерзімді әскери қызметшілердің қаза табуы мен жарақат алуы – бейбіт уақытта ешбір жағдайда орын алуға тиіс емес. Мен мұндай жағдайларға мүлде теріс қараймын. Бұл туралы жуырда барлық күштік құрылымдардың басшылары қатысқан кеңесте арнайы айттым. Қорғаныс ведомствосының басшылығын тәрбие жұмысына жеткілікті көңіл бөлмегені үшін сынға алдым», – деді Тоқаев 5 қаңтарда «Түркістан» газетінде жарияланған сұхбатында.
Мемлекет басшысы командирлер әскери қызметшілерге үлгі болуға тиіс екенін атап өтіп, әскер қатарында әлімжеттікке, тәртіпсіздікке, рушылдық пен жерлестікке жол берілмейтінін және бұған өзі жеке бақылау жасайтынын жеткізді.
«Мен жағдайды түзету үшін жедел шаралар қабылдауды тапсырдым. Сонымен қатар бұл қайғылы оқиғалар барлық әскери бөлімдерге тән емес екенін де атап өткен жөн», – деді Президент.
Оның айтуынша, жүргізілген тексеру Қарулы күштерде жалпы тәртіп пен тәрбие деңгейінің тиісті деңгейде сақталғанын көрсеткен.
«Жекелеген блогерлер танымалдыққа ұмтылып, шынайылықтан алшақ көрініс қалыптастыруда. Олар армияда әскери қызметшілер қылмыстық топтардың құрбанына айналып, күн сайын опат болып жатқандай әсер береді», – деді Тоқаев.
Президент армияны жеке даму мен шыңдалуға мүмкіндік беретін өмір мектебі ретінде бағалап, әскери қызметтің тәртіп пен жауапкершілікке тәрбиелейтінін атап өтті.
«Армия – темірдей тәртіп пен қатаң тәрбие орны. Әскери антта айтылған: «Әскери қызметтің ауыртпалығы мен қиыншылықтарына төзуге ант етемін» деген сөздер – өмір мектебінің шынайы сипатын білдіреді», – деп түйіндеді Мемлекет басшысы.
